MİLLİ MƏCLİSDƏ KÜVEYTLİ GƏNCLƏRLƏ GÖRÜŞ KEÇİRİLDİ

Fevralın 3-də parlamentin Azərbaycan–Küveyt parlamentlərarası əlaqələr üzrə işçi qrupunun üzvləri ölkəmizdə səfərdə olan Küveyt  dövlətinin “LOYAC” təşkilatının  nümayəndələri  ilə  görüşdülər. 
Qonaqları  Azərbaycan – Küveyt parlamentlərarası əlaqələr üzrə işçi qrupun rəhbəri,  millət  vəkili  Əkrəm Abdullayev  səmimi  salamlayaraq ölkələrimiz  arasında  mövcud olan siyasi, iqtisadi və mədəni əlaqələrdən  söhbət açdı. Qeyd  olundu  ki, Küveyt  Azərbaycanın müstəqilliyini tanıyan ilk ölkələrdəndir. Xalqlarımız  arasında dini  birlik və  tarixi dostluq əlaqələri  mövcuddur. Bildirildi ki, Küveyt hökuməti Ermənistan – Azərbaycan  Dağlıq Qarabağ  münaqişəsi nəticəsində öz doğma  yurd-yuvalarından  qaçqın və didərgin düşmüş azərbaycanlılardan heç vaxt öz  yardımını əsirgəməyib. Əkrəm  Abdullayev ötən il ölkə  prezidenti İlham Əliyevin Küveytə  səfərindən  danışdı və  münasibətlərimizin  inkişafında  dövlət  başçılarının  rolunu  xüsusi  vurğuladı.
Küveyt  nümayəndə  heyətinin  rəhbəri, “LOYAC”  təşkilatının  icraçı  direktoru Fərəh Əl Saqqaf nümayəndə  heyəti adından səmimi  görüş   üçün millət  vəkillərinə təşəkkürünü  bildirdi  və  qeyd  etdi ki, Azərbaycan ən  qədim  demokratik dövlətlərdən biridir.  Xanım  qonaq Şərqdə  ilk  dəfə  olaraq Azərbaycanda qadınlara siyasi  hüquqlar verildiyini diqqətə  çatdırdı, qadın  və  gənclərin  Azərbaycan  siyasətində  önəmli  yer  tutduğunu  təqdirəlayiq  hal  kimi  qiymətləndirdi. Fərəh Əl Saqqaf   daha  sonra təmsil  etdikləri  təşkilatın  fəaliyyətindən   geniş  söhbət  açdı. Bildirildi ki,   ölkələrimiz  arasında  oxşarlıqlar  var, hər  iki  dövlət  qədim  ənənələrini bugünədək qoruyub saxlamışdır. Qonaq Azərbaycana səfərlərinin  məqsədindən  söhbət  açaraq  qeyd  etdi ki,   Küveyt  gəncləri  Azərbaycanla  yaxından  tanış olmaq,  ölkəmiz haqqında  ətraflı  məlumat  almağı  çox  istəyiblər.   Bildirildi ki,  belə səfərlər hər iki ölkə  gənclərinin  təcrübə mübadiləsinə geniş imkanlar  yaradacaq. Daha  sonra çıxış  edənlər Dağlıq Qarabağ  münaqişəsi məsələsində Küveytin Azərbaycanın mövqeyini  dəstəklədiyini bildirdilər.
Görüşdə Azərbaycan – Küveyt  parlamentlərarası  əlaqələr  üzrə  işçi  qrupunun üzvləri  Çingiz  Əsədullayev, Elmira  Axundova, Fuad Muradov, Aydın Abbasov, Gənclər və İdman  Nazirliyinin  nümayəndələri də görüşdə   iştirak  edirdilər. 

Milli Məclisin
Mətbuat xidməti