MARKUS LÖNİNQ: “Azərbaycana hər səfərimdə Bakıda gördüyüm inkişaf məndə xoş təəssürat yaradır”
Martın 16-da Milli Məclisdə təmsil olunan siyasi partiyaların nümayəndələri ölkəmizdə səfərdə olan Almaniyanın insan hüquqları və humanitar yardım üzrə müvəkkili Markus Löninqlə görüşdülər.
Qonağı salamlayan deputat, Demokratik İslahatlar Partiyasının sədri Asim Mollazadə qonaqlara ölkəmizdə hüquqi, demokratik dövlət quruculuğu yolunda son zamanlar görülən işlər, həyata keçirilən islahatlar, parlamentin beynəlxalq münasibətləri, Dağlıq Qarabağ münaqişəsi barədə məlumat verdi.
Yeni Azərbaycan Partiyasının təmsilçiləri olan deputatlar Əhliman Əmiraslanov, Əhməd Vəliyev, Ümid Partiyasının sədri İqbal Ağazadə Azərbaycanın Almaniya ilə çoxşaxəli əlaqələrinin mövcud olduğundan söhbət açdılar. Bildirildi ki, Milli Məclisin Bundestaqla əməkdaşlığı inkişaf edir. Qonağa parlamentin qanun yaradıcılığı prosesi, ölkədə insan hüquqlarının təminatı, digər ölkə və parlamentlərlə əlaqələrin perspektivi barədə məlumat verildi.
Almaniyanın insan hüquqları və humanitar yardım üzrə müvəkkili Markus Löninq ilk dəfə Azərbaycanda on il bundan əvvəl olduğunu, ötən müddətdə Bakıya 4 dəfə səfər etdiyini, hər gəlişində fərqli paytaxtla qarşılaşdığını dedi. Bildirdi ki, Bakının siması Azərbaycanın necə sürətlə inkişaf etdiyinin göstəricisidir. Almaniyalı qonaq ikitərəfli əməkdaşlıq münasibətlərindən söz açaraq ölkəmizin çox mühüm geosiyasi mövqedə yerləşdiyini qeyd etdi. Dağlıq Qarabağ probleminin həllinin vacibliyindən danışan qonaq bildirdi ki, Almaniya münaqişənin həllində beynəlxalq hüququn norma və prinsiplərinə istinad edir.
Görüşdə qarşılıqlı maraq doğuran məsələlər ətrafında fikir mübadiləsi aparıldı.
Milli Məclisin
Mətbuat xidməti