SOSİAL SİYASƏT KOMİTƏSİNİN İCLASINDA
Noyabrın 26-da Milli Məclisin Sosial siyasət komitəsinin növbəti iclası keçirildi. İclası açan komitə sədri Hadi Rəcəbli bildirdi ki, bugünkü iclasın gündəliyininə iki məsələ daxil edilib.
Əvvəlcə komitə üzvləri “Dərman vasitələri haqqında” qanuna edilən dəyişikliklər barədə sənədi müzakirə etdilər. Bildirildi ki, qanuna əlavə edilən yeni maddəyə əsasən dövlət qeydiyyatına alınmış dərman vasitələrinin tarif və qiymətlərinin tənzimlənməsi, həmin qiymətlərə dövlət tərəfindən nəzarətin həyata keçirilməsi qaydaları müəyyən ediləcək. Komitə sədri vurğuladı ki, indiyə kimi rayonlara ayrılan dərman vasitələri ilə bağlı vəsaitlər rayonların büdcəsində cəmləşirdi. Növbəti ilin büdcəsində bu vəsaitlərin bir əldə cəmləşməsi və bunun Səhiyyə Nazirliyi vasitəsilə həyata keçirilməsi nəzərdə tutulur. Bundan sonra müxtəlif regionlarda dərmanların qiymətlərində olan fərqlər də aradan qaldırılacaq.
Sonra deputatlar “Sağlamlıq imkanları məhdud şəxslərin təhsili (xüsusi təhsil) haqqında” qanun layihəsinə dəyişikliklər edilməsi ilə bağlı sənədə baxdılar. Hadi Rəcəbli bildirdi ki, sənədə əsasən evdə təhsilə cəlb olunan sağlamlıq imkanları məhdud şəxslərin valideyinlərinə və ya digər qanuni nümayəndələrinə müavinətlər veriləcək. Komitə üzvləri qanuna edilən dəyişiklikləri sosial dəstək elementi adlandırdılar.
Müzakirələrdən sonra hər iki sənəd Milli Məclisin plenar iclasına tövsiyə edildi.
Milli Məclisin
Mətbuat xidməti