PARLAMENT XƏBƏRLƏRİ
Milli Məclisin deputatı Azay Quliyev ATƏT Parlament Assambleyasının Büro iclasında iştirak etmək üçün dekabrın 2-də İsveçrənin Bazel şəhərinə səfərə gedəcək.
Büro iclasında ABŞ-da, Ukraynada, Moldovada, Bosniya və Herseqovinada keçirilmiş seçkilərin müşahidə olunmasının nəticələri, ATƏT PA-nın keçirəcəyi gələcək tədbirlər və başqa mövzularda fikir mübadiləsi aparılacaqdır.
Səfər müddətində deputat Azay Quliyev ATƏT-in Nazirlər Şurasının iclasına da qatılacaqdır.
Səfər dekabrın 7-də başa çatacaq.
* * *
Milli Məclisin deputatı Sahibə Qafarova Avropa Şurası Parlament Assambleyasının Gender bərabərliyi üzrə alt komitəsinin iclasında iştirak etmək üçün dekabrın 2-də Parisə yola düşəcək.
Tədbirdə Avropada dözümsüzlük və diskriminasiya ilə mübarizə və digər mövzularda müzakirələr aparılacaqdır.
Səfər çərçivəsində deputat Sahibə Qafarova Londonda “Böyük Britaniyada qadınlara qarşı zorakılıqla mübarizə” mövzusunda keçiriləcək seminarda da iştirak edəcəkdir.
Deputatın səfəri dekabrın 10-da başa çatacaqdır.
Milli Məclisin
Mətbuat xidməti