MİLLİ MƏCLİSİN SOSİAL SİYASƏT KOMİTƏSİNDƏ
Fevralın 10-da Milli Məclisin Sosial siyasət komitəsinin növbəti iclası keçirildi. İclası açan komitə sədri Hadi Rəcəbli əvvəlcə gündəlikdəki məsələlər haqqında məlumat verdi.
Əvvəlcə gündəliyə təqdim olunan “Tibbi sığorta haqqında” qanunda dəyişikliklər edilməsi barədə sənədlə əlaqədar danışan komitə sədri bildirdi ki, qanun layihəsinə edilən dəyişikliklər “İcbari sığortalar haqqında” qanuna uyğunlaşdırılma məqsədi ilə aparılıb. Qanunun 13-cü maddəsinə icbari tibbi sığorta üzrə müvafiq riskləri sığorta etdirmək üçün müraciət edən və sığorta marağı olan şəxslə icbari tibbi sığorta müqaviləsi bağlamaq şərti əlavə edilib.
Sonra iclasda “Dərman vasitələri haqqında” qanunda dəyişikliklər edilməsi barədə sənədin layihəsi müzakirə edildi. Qeyd olundu ki, təklif olunan dəyişikliklər dərman vasitələrinin keyfiyyəti, səmərəliliyi və təhlükəsizliyi üzərində dövlət nəzarətinin gücləndirilməsi məqsədi ilə bu vasitələr üzərində nəzarət markaları vurulmasını tələb edir. Nəzarət markasının forması, uçotu, istifadəsi və verilməsi qaydaları, markalara görə ödənilən haqqın məbləği müvafiq icra hakimiyyəti orqanı tərəfindən müəyyən edilir. Nəzarət markalarının alınmasına görə ödənilən vəsaitlər dövlət büdcəsinə köçürülür. Həmin vəsaitlərin dövlət büdcəsinə daxil olmasına nəzarət edilməsi və uçotunun aparılması qaydası da müvafiq icra hakimiyyəti orqanı tərəfindən tənzimlənir və nəzarət markalarının hazırlanması təmin edilir.
Daha sonra komitədə “Ünvanlı dövlət sosial yardımı haqqında” qanunda dəyişiklik edilməsi barədə” qanun layihəsinə də baxıldı. Bildirildi ki, qanunun 8.1-ci maddəsindəki “1 il” sözü “2 il” sözü ilə əvəzlənib. Burada əsas məqsəd vətəndaşların hüquqlarının daha güclü şəkildə qorunması, onların sosial vəziyyətinin daha da yaxşılaşdırılmasıdır. Əgər vətəndaşlar 1 il müddətinə bu hüquqdan yararlanırdılarsa, indi yenidən heç bir sənəd düzəltmədən iki il bu hüquqdan istifadə etmək imkanı əldə edəcəklər.
İclasda çıxış edən komitə üzvləri Musa Quliyev, Əhliman Əmiraslanov, Yaqub Mahmudov, Sədaqət Vəliyeva, Rauf Əliyev, Elmira Axundova təklif olunan əlavə və dəyişikliklərin vacibliyini bildirərək, bu yeniliklərin vətəndaşların sosial müdafiəsinə yönəldiyini vurğuladılar.
Qanun layihələri baxılmaq üçün Milli Məclisin plenar iclasına tövsiyə edilib.
Milli Məclisin
Mətbuat xidməti