TÜRKİYƏNİN TANINMIŞ MEDİA QURUMLARININ NÜMAYƏNDƏLƏRİ MİLLİ MƏCLİSDƏ
Aprelin 3-də Milli Məclisin Sədr müavini Bahar Muradova Azərbaycan Mətbuat Şurasının dəvəti ilə Bakıda səfərdə olan Türkiyənin tanınmış kütləvi informasiya vasitələrinin təmsilçiləri ilə görüşdü.
Qonaqları səmimi salamlayan Bahar Muradova dünyaya örnək olan Azərbaycan-Türkiyə dostluq və qardaşlığından söhbət acdı. İki dövlət arasındakı münasibətlərin hazırkı səviyyəsindən məmnunluğunu ifadə edən vitse-spiker, bu münasibətlərin yaranmasında ümummilli lider Heydər Əliyevin unudulmaz rolundan bəhs etdi. Bahar Muradova Ulu öndərin “Bir millət-iki dövlət” fikrinə hər zaman sadiq olduğumuzdan, Azərbaycanın sürətli inkişafından, ölkəmizin uğurlarından, Azərbaycanın ev sahibliyi etdiyi mötəbər tədbirlərdən, ölkədə aparılan islahatların gedişatından ətraflı danışdı. O, söhbətində Türkiyənin Baş naziri Əhməd Davudoğlunun Azərbaycanda səfərdə olarkən söylədiyi bir fikrə diqqəti yönəltdi ki, dünyada iki elə dövlətin bayrağı yoxdur ki, yan-yana qoyarkən Azərbaycan və Türkiyə bayraqları qədər bir-birinə yaraşmış olsun. Bahar Muradova söhbətdə türk dünyasını təmsil edən media nümayəndələri arasında belə qarşılıqlı səfərlərin intensivləşməsinin zəruriliyini vurğuladı.
Sonra Azərbaycanın ən ağrılı problemi olan Dağlıq Qarabağ münaqişəsinin hazırkı vəziyyətindən söz açan parlament sədrinin müavini münaqişənin nəinki ölkəmizi, bütövlükdə regionu təhdid altında saxladığını vurğuladı. Bu münaqişənin həlli istiqamətində görülən işlərdə Türkiyənin hər zaman Azərbaycana dəstək olduğunu fəxarətlə dilə gətirdi, parlamentimiz və xalqımız adından Türkiyə hökumətinə minnətdarlığını ifadə etdi.
Türkiyə Qəzetəçilər Federasiyasının təmsilçisi Yılmaz Karaca nümayəndə heyəti adından səmimi görüş və qonaqpərvərlik üçün təşəkkür etdi. Bildirildi ki, səfərin məqsədi Azərbaycan həqiqətlərinin Türkiyə və dünya ictimaiyyətinə daha yaxından çatdırılması istiqamətindəki aparılan fəaliyyətə dəstək göstərməkdən, I Avropa Olimpiya Oyunları ilə bağlı həyata keçirilməkdə olan işlərin geniş şəkildə işıqlandırılmasını təmin etməkdən, hər iki ölkə mediası arasındakı əməkdaşlığı daha da dərinləşdirməkdən ibarətdir. O, səfər çərçivəsində Dağlıq Qarabağın Azərbaycanlı İcmasında, Heydər Əliyev Mərkəzində, I Avropa Oyunlarının Təşkilat Komitəsində görüşlər keçirəcəklərini qeyd etdi, paytaxtımıza yeni gətirilən idman qurğuları ilə tanış olacaqlarını vurğuladı.
Görüşdə Milli Məclisin komitə sədri, Azərbaycan -Türkiyə parlamentlərarası əlaqələr üzrə işçi qrupunun rəhbəri Nizami Cəfərov, deputatlardan Cavanşir Feysizyev, Çingiz Əsədullayev, Mətbuat Şurasının sədri Əflatun Amaşov və digər rəsmi şəxslər iştirak edirdilər.
Türkiyə Qəzetəcilər Federasiyasının təmsilçiləri ilə yanaşı, “Sabah”, “Posta”, “Hürriyet” qəzetlərinin, Fox, NTV, ATV, “Kanal A”, “CNN Türk” telekanallarının, “Anadolu” agentliyinin məsul əməkdaşlarının qatıldığı tədbirdə qonaqlar ölkəmizlə, parlamentlə bağlı ürəkaçan fikirlərini səsləndirdilər, onları maraqlandıran suallara aydınlıq gətirildi.
Milli Məclisin
Mətbuat xidməti