MİLLİ MƏCLİSDƏ ULU ÖNDƏRİN GƏNCLƏR SİYASƏTİNƏ HƏSR OLUNMUŞ DİNLƏMƏLƏR KEÇİRİLDİ
Mayın 5-də Milli Məclisin Sosial siyasət komitəsində icra strukturları, gənclər təşkilatları və QHT nümayəndələrinin iştirakı ilə “Heydər Əliyev və gənclər siyasəti sahəsində qanunvericilik” mövzusunda dinləmələr keçirildi.
Toplantını giriş sözü ilə açan komitə sədri Hadi Rəcəbli dedi ki, bu tədbir Ulu öndər Heydər Əliyevin anadan olmasının 92-ci il ildönümü münasibətilə Azərbaycan Gənclər Təşkilatları Milli Şurasının (ARGTMŞ) təşəbbüsü ilə keçirilir. Bildirildi ki, Azərbaycan xalqının ümummilli lideri Heydər Əliyev öz yorulmaz fəaliyyəti dövründə daim gənclərə etimad göstərib, onların inkişafını diqqət mərkəzində saxlayıb. O, Azərbaycanda gənclər siyasətinin formalaşmasından, inkişafından, bu sahədə qəbul edilmiş qanunvericilik aktlarından danışdı, birinci Avropa Oyunlarının əhəmiyyəti barədə fikirlərini açıqladı. Qeyd olundu ki, Azərbaycanın dahi şəxsiyyəti, dünya miqyaslı siyasi və dövlət xadimi Heydər Əliyevin xidmətləri sayəsində xalqımız siyasi və iqtisadi müstəqilliyin möhkəm təməlini yaratdı, müstəqil dövlət qurmaq, onu qoruyub yaşatmaq üçün tarixin verdiyi imkanları reallaşdırdı.
Komitə sədri gənclərə Milli Məclisin strukturu, iş prinsipləri barədə də ətraflı məlumat verdi. Bildirildi ki, parlamentdə qəbul edilən qanunlar millətin genofondunu təşkil edən gənclərin inkişafı, formalaşması üçün yaxşı imkanlar yaradır. Bu gün gənclər ölkədə bütün sahələrdə təmsil olunur, müxtəlif uğurlara imza atır.
Milli Məclis sədrinin müavini Bahar Muradova təməlini ulu öndər Heydər Əliyevin qoyduğu böyük inkişafın və uğurların təkcə ölkəmizə deyil, bütövlükdə regiona faydalı olduğunu dedi. Vitse-spiker ulu öndərin Azərbaycana rəhbərliyi dövründə ölkədə bütün sahələrdə qazanılan uğurlardan danışaraq müasir Azərbaycan parlamentinin yaradılmasında və formalaşmasında ulu öndərin xidmətlərini qeyd etdi. Bahar Muradova bildirdi ki, Ümummilli lider Heydər Əliyev ölkə rəhbəri olduğu ilk dövrlərdən gənclərin himayədarı olaraq sağlam düşüncəli yeni nəslin yetişdirilməsini dövlət və cəmiyyətin mühüm vəzifəsi hesab edib. Bu gün Heydər Əliyev siyasi kursunu layiqli şəkildə davam etdirən Azərbaycan Prezidenti İlham Əliyev də gənclər siyasətinə eyni diqqətlə yanaşır. Qeyd olundu ki, hazırda dünyada Azərbaycanı sevənlərlə yanaşı, qüdrətlənməsini, uğurlarını qısqanclıqla qarşılayanlar da var. Lakin Heydər Əliyev ideyasını daşıyan gənclərimiz ölkəmizə qarşı məkrli niyyəti olanların qarşısında cəsarət və mətanətlə dayanır. Bugünkü gənclik onu deməyə əsas verir ki, Azərbaycanın gələcəyi çox inamlı və etibarlı əllərdə olacaq.
Toplantıda iştirak edən Gənclər və idman nazirinin müavni İntiqam Babayev ulu öndərin gənclərə göstərdiyi diqqət və qayğıdan danışdı, onun idarəçiliyi dövründə ölkəmizdə həyata keçirilən nəhəng layihələrdən söz açdı. Hazırda 2016-2020-ci illəri əhatə edəcək yeni “Azərbaycan gəncliyi” Dövlət Proqramının hazırlandığını bildirdi.
Milli Məclisin deputatları Sədaqət Vəliyeva, Sevinc Hüseynova, Rauf Əliyev, Sosial qanunvericilik şöbəsinin müdiri Adilə Abasova, Azərbaycan Gənclər Təşkilatları Milli Şurasının baş katibi Şahin Seyidzadə, digər gənclər təşkilatlarının nümayəndələri öz çıxışlarında ulu öndər Heydər Əliyevin Azərbaycan xalq qarşısında əvəzsiz xidmətlərindən danışdılar. Qeyd olundu ki, xalqımıza zəngin irs qoyan Heydər Əliyev ölkənin ardıcıl inkişaf yolunu müəyyənləşdirib, hüquqi dövlət quruculuğu üçün bütün təminatlar yaradılıb. Daim Azərbaycanın müstəqilliyinin dönməzliyi onun ölümsüz adı ilə bağlı olacaq.
Görüşdə, Ulu öndər tərəfindən ölkənin gənclər siyasəti ilə bağlı qanunvericiliyinə verilən töhfələrdən danışıldı, Birinci Avropa Oyunları ilə əlaqədar fikir mübadiləsi aparıldı.
Milli Məclisin
Mətbuat xidməti