MİLLİ MƏCLİSDƏ MƏTBUAT KONFRANSI
Aprelin 4-də Milli Məclisdə Avronest Parlament Assambleyasının həmsədrləri Kristian Vigenin və Boris Tarasyukun iştirakı ilə qurumun ikinci sessiyasının yekunlarına həsr olunmuş mətbuat konfransı keçirildi.
Konfransı təşkilatın mətbuat katibi Aqnesi Krivad açdı. Avronest Parlament Assambleyasının həmsədri Kristian Vigenin sessiyanın keçirilməsinə verilən siyasi və texniki dəstəyə görə Azərbaycan tərəfinə təşəkkürünü bildirdi. O, ölkə Prezidenti İlham Əliyevə sessiyanın işinə qatılaraq tədbiri şərəfləndirdiyinə görə xüsusi minnətdarlığını ifadə etdi.
Konfransda qeyd olundu ki, təşkilata üzv olan bütün nümayəndə heyətlərinin Bakıya gəlməsinə və Assambleyanın sessiyasında iştirak etməsinə yüksək səviyyədə şərait yaradılmışdı. Həmsədr bildirdi ki, bu, Assambleyanın ilk yığıncağı idi ki, Avropanın hüdudlarından kənarda təşkil olunmuşdu və bu qədər geniş tərkibdə Avropa Parlamentinin üzvləri belə bir tədbirdə iştirak edirdilər. İclasda 4 hesabat və 1 qətnamə qəbul edildi ki, bu da 11 aydan bəri həyata keçirilən qarşılıqlı səylərin nəticəsi idi. Göründüyü kimi, təşkilatın Strasburqda keçirilən ilk iclasından fərqli olaraq Bakıda keçirilən iclas məhsuldar olmuşdur.
Həmsədr bildirdi ki, Azərbaycan dinamik inkişaf edən və dünyada rolu getdikcə artmaqda olan ölkə kimi Avropanın daim diqqət mərkəzindədir. Azərbaycan BMT Təhlükəsizlik Şurasının qeyri-daimi üzvü seçilib. Bu ölkənin qəbul etdiyi qərarlar Avropa Parlamentinin maraqlarına tam uyğundur. Avronest PA Şərq Tərəfdaşlığı Proqramının parlament ölçüsü kimi yaradılan bir qurumdur. Sessiyada demokratiya ilə bağlı qəbul edilən hesabatda qeyd olunan məsələlər tək Şərq Tərəfdaşlığı Proqramına üzv ölkələr üçün deyil, Avropa Birliyi ölkələri üçün də aktualdır. Avronest PA-nın yaradılmasında məqsəd ondan ibarət olmuşdur ki, birgə məqsədlər uğrunda mübarizəmizi daha da gücləndirək.
Mətbuat konfransında həmsədr Ermənistan nümayəndə heyətinin tam tərkibdə bu sessiyada iştirak etməsinə və bu məsələyə avropasayağı yanaşmaya görə Azərbaycan tərəfinə dərin təşəkkürünü bildirdi.
Təşkilatın digər həmsədri Boris Tarasyuk da sessiyaya yüksək səviyyədə hazırlığa görə Milli Məclis rəhbərliyinə minnətdarlığını ifadə etdi. Bildirildi ki, qurumun ilk sessiyası 7 ay əvvəl keçirilsə də, prosedur qaydalarındakı çatışmazlıqlar üzündən sessiyada heç bir qərar qəbul olunmamışdı. Amma ikinci sessiyada prosedur qaydalarına edilən düzəlişlərdən sonra sessiya müvəffəqiyyətlə başa çatmışdır. Bakı sessiyasında insan hüquqları, demokratiya, iqtisadi və enerji sahəsində əməkdaşlıq, sosial həyat və vətəndaş cəmiyyətinə dair çox vacib qərarlar qəbul edilmişdir. Həmsədr 7 il əvvəl Azərbaycana Ukraynanın xarici işlər naziri kimi gəldiyini və ötən dövrdə Azərbaycandakı böyük dəyişikliklərin onda olduqca yüksək təəssüratlar oyatdığını diqqətə çatdırdı.
Jurnalistlərin suallarına cavab verən həmsədrlər bildirdilər ki, Azərbaycan insan hüquqları və media azadlığı sahəsində vəziyyəti təkmilləşdirməyə davam edir, biz bunu dəstəkləyir və alqışlayırıq. Qeyd olundu ki, qurumun Siyasi məsələlər üzrə komitəsində Dağlıq Qarabağ münaqişəsi də nəzərdən keçiriləcəkdir, lakin məsələnin həlli ilə bağlı əsas format ATƏT-in Minsk qrupudur.
Boris Tarasyuk Ukrayna parlamentinin nümayəndəsi kimi diqqətə çatdırdı ki, onun ölkəsi Dağlıq Qarabağ münaqişəsində hər zaman Azərbaycanı dəstəkləyir. Problem BMT Təhlükəsizlik Şurasının qətnamələri əsasında, beynəlxalq hüququn norma və prinsiplərinə uyğun həll olunmalıdır. Ukrayna işğal olunmuş Azərbaycan torpaqlarının geri qaytarılmasının tərəfdarıdır. Boris Tarasyuk dedi ki, Azərbaycan Ukrayna üçün dost ölkə və strateji tərəfdaşdır.
Sonra konfransda mətbuat nümayəndələrini maraqlandıran digər suallar cavablandırıldı və məlumat verildi ki, Avronest PA-nın növbəti üçüncü sessiyası 2013-cü ilin mayın 28-29-da Brüsseldə keçiriləcəkdir.
Milli Məclisin
Mətbuat xidməti