AZƏRBAYCAN - YAPONİYA ƏLAQƏLƏRİ İNKİŞAF EDİR
Mayın 6-da Milli Məclis Sədrinin müavini, İnsan hüquqları komitəsinin sədri Bahar Muradovanın ölkəmizdə səfərdə olan Yaponiya Nümayəndələr Palatasının və ölkənin hakim Liberal Demokrat Partiyasının üzvləri ilə görüşü oldu.
Qonaqları səmimi salamlayan Bahar Muradova qeyd etdi ki, Azərbaycan Yaponiya ilə əlaqələrin inkişafına çox ciddi əhəmiyyət verir. Gündoğar ölkənin dərin tarixi kökləri, qədim mədəniyyəti, güclü müasir inkişafı, qüdrətli elmi və iqtisadi nailiyyətləri Azərbaycanda dərin maraq yaradır. Vitse-spiker vurğuladı ki, Yaponiya Azərbaycan öz müstəqilliyini bərpa etdikdən sonra hər zaman ölkəmizin mövqelərini dəstəkləyən dost ölkədir. Məhz buna görə də bu gün Yaponiya ilə humanitar, mədəni, iqtisadi, ictimai-siyasi əlaqələrimiz çox çevik şəkildə inkişaf edir.
Sonra Bahar Muradova əlaqələrimizin daha da dərinləşməsində hər iki ölkə parlamentarilərinin qarşılıqlı səfərlərinin, dostluq qruplarının uğurlu fəaliyyətinin xüsusi rolu olduğunu dilə gətirdi. Mədəni əlaqələrimizin gücləndirilməsinin vacibliyindən danışan parlament sədrinin müavini hər iki ölkədə mədəniyyət ongünlüklərinin keçirilməsinin əhəmiyyətini vurğuladı.
Vitse-spiker Azərbaycanın ən ağrılı problemi olan Ermənistan-Azərbaycan, Dağlıq Qarabağ münaqişəsinin hazırkı durumundan bəhs etdi. Qeyd olundu ki, münaqişə nəinki ölkəmizin, bütövlükdə regionun inkişafına böyük əngəl törədir. Beynəlxalq təşkilatların, xüsusən ATƏT-in Minsk qrupunun bu problemin həllində qətiyyətli mövqe tutmamasından, münaqişənin regionun təhlükəsizliyini təhdid altında saxlamasından söhbət açdı. Bahar Muradova millət vəkili olaraq təmsil etdiyi Füzuli rayonunun da bir hissəsinin erməni silahlı qüvvələrinin işğalı altında olmasından, ailəsinin və doğmalarının öz dədə-baba yurdlarından didərgin düşməsindən, insanların bu yolda çəkdikləri əziyyətlərdən danışdı. Aprel ayının əvvəllərində cəbhəyanı ərazilərdə gərginliyin artmasından, qızğın döyüşlərdə seçicisi olan 5 nəfərin şəhid olmasından, 10 nəfərin ağır yara aldığından ürək ağrlısı ilə söz açdı. Ermənistanın status-kvonun saxlanılması üçün göstərdiyi cəhdlərin aradan qaldırılması, davamlı sülhün bərpası üçün Yaponiya ictimaiyyətinin, hökumətinin, Yaponiya-Azərbaycan parlamentlərarası dostluq qrupunun ATƏT-in Minsk qrupuna bu sahədə fəaliyyətini artırması üçün çağırışlar etməsinə ehtiyac olduğunu diqqətə çatdırdı.
Qonaqpərvərliyə və ölkəsi haqqında ürəkaçan fikirlərə görə təşəkkürünü bildirən Yaponiya Nümayəndələr Palatasının üzvü, Liberal Demokrat Partiyasının Beynəlxalq əlaqələr Bürosunun Baş direktoru Kazunori Tanaka burada müşahidə etdikləri sürətli iqtisadi və mədəni inkişafı yüksək qiymətləndirdi. Qonaq Azərbaycanın əsrarəngiz təbiətə malik olmasından olduqca məmnun qaldıqlarını, ölkələrimiz arasında turizm sahəsində əməkdaşlığın gücləndirilməsinin vacibliyini vurğuladı.
Sonra Kazunori Tanaka aprel ayının əvvəllərində Azərbaycanın Ermənistanla sərhəd ərazilərində atəşkəsin pozulması nəticəsində şəhid olan insanlara görə xalqımıza Yaponiyanın hakim Liberal Demokrat Partiyası adından başsağlıqlarını çatdırdı, vitse-spikerin fikirlərini həm partiya rəhbərliyinə, həm dostluq qrupunun rəhbərliyinə çatdıracağını bəyan etdi. Bu münaqişənin tezliklə sülh yolu ilə ədalətli həllinə nail olunacağına ümidvar olduğunu bildirdi.
Görüşdə Azərbaycan-Yaponiya parlamentlərarası əlaqələr üzrə işçı qrupunun rəhbəri Muxtar Babayev, Yaponiyanın Azərbaycandakı fövqəladə və səlahiyyətli səfiri Tsuquo Takahaşi və digər rəsmi şəxslər iştirak edirdilər.
Söhbətdə qarşılıqlı maraq doğuran bir sıra məsələlər barəsində də fikir mübadiləsi aparıldı.
Milli Məclisin
Mətbuat xidməti