AŞPA-NIN KOMİTƏLƏRİNDƏ
Milli Məclisin Ailə, qadın və uşaq məsələləri komitəsinin sədr müavini Sahibə Qafarova AŞPA-nın Bərabərlik və qeyri-diskriminasiya komitəsinin iclasında iştirak etmək üçün mayın 11-dən 15-dək Almaniyanın Berlin şəhərində səfərdə olacaq.
Sonra deputatımız Bərabərlik və qeyri-diskriminasiya komitəsinin Alt komitəsinin iclasına qatılmaq üçün mayın 16-19-da İsveçin Stokholm şəhərinə, Büro və Daimi komitənin iclaslarında iştirak etmək üçün mayın 25-28-də Estoniyanın paytaxtı Tallin şəhərinə səfər edəcək. Toplantılarda dünyada qadınlara qarşı zorakılığın aradan qaldırılması, gender bərabərliyinin təmin edilməsi, bərabərlik və qeyri-diskriminasiya prosesinin İsveç modeli, qaçqın qadınların hüquqları ilə bağlı məsələlər müzakirə obyekti olacaq.
Sahibə Qafarova daha sonra sədri olduğu Miqrasiya komitəsi çərçivəsində keçiriləcək tədbirlərlə əlaqədar mayın 28-dən iyunun 2-dək Yunanıstanın Afina, iyunun 2-dən 4-dək isə Fransanın Paris şəhərlərində olacaq. Burada Yunanıstanda və İordaniyada qaçqınların vəziyyəti, Avropada kimsəsiz uşaqların problemləri, Qəzza bölgəsində humanitar krizis, dini azlıqların ailə və uşaq hüquqlarının təminatı və digər cari məsələlər barəsində fikir mübadiləsi aparılacaq.
Deputatımız səfər proqramı çərçivəsində keçirilən bütün toplantılarda müzakirə olunan məsələlərlə bağlı fikirlərini bildirəcək.
Milli Məclisin
Mətbuat xidməti