AZƏRBAYCAN – İNDONEZİYA DOSTLUQ TELLƏRİ MÖHKƏMLƏNİR
Mayın 18-də Milli Məclisin Beynəlxalq münasibətlər və parlamentlərarası əlaqələr komitəsinin üzvlərinin ölkəmizdə səfərdə olan İndoneziya parlamentinin deputatları ilə görüşü oldu.
Qonaqları salamlayan komitə sədri Səməd Seyidov onlara rəhbərlik elədiyi komitənin işi, qanun yaradıcılığı prosesi barədə məlumat verdi. O, xalqlarımız arasındakı dostluq əlaqələrini yüksək qiymətləndirdi və İndoneziyanın hər zaman beynəlxalq təşkilatlarda Azərbaycanı dəstəklədiyini vurğuladı. Komitə sədri ölkəmizin sürətli iqtisadi inkişafı, həyata keçirilən islahatlar, istimai-siyasi, elmi, humanitar sahələrdə əldə olunan nailiyyətlərdən danışdı.
Sonra komitə sədrinin müavini Sevinc Fətəliyeva və millət vəkili Asim Mollazadə qonaqlara ölkəmizin müstəqillik qazandıqdan sonra keçdiyi şərəfli yol, demokratiyanın inkişafı sahəsində atılan addımlar, terrorizmlə mübarizə sahəsində görülən işlərdən söhbət açdılar. Ermənistan-Azərbaycan, Dağlıq Qarabağ münaqişəsinin mövcud durumu barədə ətraflı məlumat verildi. Qeyd olundu ki, bu münaqişədə minlərlə insan şəhid olub, yüz minlərlə insan hər hansı formada zərər çəkib, ölkədə bir milyondan artıq qaçqın və məcburi köçkün var. Amma bütün bunlara baxmayaraq Azərbaycan dövləti problemin sülh yolu ilə, beynəlxalq hüququn norma və prinsiplərinə uyğun olaraq həllinə tərəfdardır. Çünki, münaqişə nəinki, Azərbaycanın, bütövlükdə regionun təhlükəsizliyini təhdid edir.
İndoneziya parlamentinin deputatı, nümayəndə heyətinin rəhbəri Ahmad Hanafi Rais səmimi görüş və ətraflı məlumat üçün minnətdarlığını bildirdi. Qeyd olundu ki, xalqlarımız arasında münasibətlərin təməli 1992-ci ildə qoyulub. İki dost ölkə arasında qardaşlıq münasibətlərinin daha da inkişaf etdirilməsi üçün əsaslı zəmin var. Qonaq iqtisadi əlaqələrin daha da gücləndirilməsinin, parlamentarilər arasında qarşılıqlı səfərlərin intensiv hal almasının zəruriliyini qeyd etdi.
Görüşdə qarşılıqlı maraq doğuran bir sıra məsələlər barədə fikir mübadiləsi aparıldı.
Milli Məclisin
Mətbuat xidməti