ATƏT PA-NIN XÜSUSİ NÜMAYƏNDƏSİ MİLLİ MƏCLİSDƏ
Mayın 27-də Milli Məclisin ATƏT Parlament Assambleyasındakı nümayəndə heyətinin üzvləri ölkəmizdə səfərdə olan qurumun Cənubi Qafqaz üzrə xüsusi nümayəndəsi Kristian Vigenin ilə görüşdülər.
Qonağı salamlayan Milli Məclis Sədrinin müavini, nümayəndə heyətinin rəhbəri Bahar Muradova onun ölkəmizə çox gözəl bir bayram – 28 May Respublika günü ərəfəsində gəldiyini dedi. Azərbaycanın müstəqillik tarixindən, son illər qazanılan uğurlardan, aparılan islahatlardan ətraflı söhbət açdı. Bildirildi ki, Azərbaycan beynəlxalq təşkilatlarla münasibətlərə xüsusi önəm verir. ATƏT-Azərbaycan əməkdaşlığından geniş söz açan Bahar Muradova qeyd etdi ki, ölkəmiz ATƏT-in bərabərhüquqlu üzvü olmaqla yanaşı təşkilatın dəyərlərinin regionda bərqərar olmasının ən fəal təbliğatçısıdır.
Sonra nümayəndə heyətinin rəhbəri Ermənistan-Azərbaycan Dağlıq Qarabağ münaqişəsinin hazırkı durumu haqqında qonağa məlumat verdi. Problemin ədalətli həlli, regionda təhlükəsizliyin təmin olunması üçün təşkilatın cəhdlərini artırmasının vacibliyini diqqətə çatdırdı. Qeyd olundu ki, hazırda mövcud status-kvonun saxlanılması münaqişə tərəflərindən yalnız Ermənistanı qane edir. Bu isə regionu daha ciddi kataklizmlərə sürükləyir. ATƏT bu yöndə vacib olan addımlar atmalı, Ermənistan tərəfinə ciddi təsirlər göstərməlidir.
ATƏT Parlament Assambleyasının Cənubi Qafqaz üzrə xüsusi nümayəndəsi Kristian Vigenin qarşıdan gələn 28 May – Respublika günü münasibəti ilə xalqımızı təbrik etdi. Qonaq ölkəmizə hər gəlişində müşahidə etdiyi yeniliklərdən məmnun qaldığını dilə gətirdi. Azərbaycanla münasibətlərin uğurlu davamına təkan vermək niyyətini açıqlayan Vigenin bildirdi ki, ATƏT PA-nın ölkəmizlə əməkdaşlığında demokratiyanın inkişafı başlıca yer tutur. Qonaq Ermənistan – Azərbaycan Dağlıq Qarabağ münaqişəsinin ədalətli həllinə nail olunması üçün müsbət danışıq mühitin yaradılmasında əlindən gələni əsirgəməyəcəyini də vurğuladı.
Görüşdə millət vəkilləri Azay Quliyev, Kamran Nəbizadə, Tahir Mirkişili, Elşad Həsənov, Ülviyyə Ağayeva və digər rəsmi şəxslər işrtirak edirdilər.
Söhbətdə qarşılıqlı əhəmiyyət kəsb edən bir sıra məsələlər barəsində fikir mübadiləsi aparıldı, hər iki tərəfi maraqlandıran suallara cavab verildi.
Milli Məclisin
Mətbuat xidməti