Milli Məclisin deputatları Sevinc Fətəliyeva və Qənirə Paşayeva Avropa Şurası Parlament Assambleyasının Sosial məsələlər, sağlamlıq və davamlı inkişaf komitəsinin iclasında iştirak etmək üçün sentyabrın 20-də Fransanın paytaxtı Parisə səfər edəcəklər.
Tədbirdə insan hüquqları və etik qaydalar; demokratik sistemdə sosial ədalət çatışmazlığı və iqtisadi sistemə inam; tətil və iş hüququ: işçilərin sosial fəaliyyətinin inkişafı; Avropada uşaqların sağlamlığının və onlara qayğının təmin olması və bir sıra digər mövzularda müzakirələr keçiriləcək.
Millət vəkilləri müzakirə olunan məsələlər barədə öz fikirlərini səsləndirəcəklər.
Səfər sentyabrın 22-də başa çatacaq.

*     *     *

Milli Məclisin deputatı, Avropa Şurası Parlament Assambleyasının Miqrasiya, qaçqınlar və məcburi köçkünlər üzrə komitəsinin sədri Sahibə Qafarova rəhbərlik etdiyi komitənin iclasında iştirak etmək üçün sentyabrın 21-də Parisə yola düşəcək.
Toplantında miqrasiya siyasəti üzrə Avropada demoqrafik dinamikada nöqsan; miqrasiya: Avropanın inkişafı üçün bir şans; Ukrayna böhranının humanitar nəticələri; Fələstinin Qəzza bölgəsində humanitar vəziyyət və digər məsələlər ətrafında fikir mübadiləsi aparılacaq.
Millət vəkili Sahibə Qafarova onun sədrliyi ilə keçirilən iclasda gündəlikdəki məsələlərə öz münasibətini bildirəcək.
Səfər sentyabrın 23-də başa çatacaq.

Milli Məclisin
Mətbuat xidməti