AVSTRALİYALI QONAQLAR MİLLİ MƏCLİSDƏ
Sentyabrın 27-də Milli Məclisin Avstraliya ilə parlamentlərarası əlaqələr üzrə işçi qrupu üzvlərinin ölkəmizdə səfərdə olan Avstraliya parlamentinin nümayəndələri ilə görüşü oldu.
Milli Məclisin deputatı, işçi qrupun rəhbəri Xanlar Fətiyev ölkələrimiz arasındakı dostluq münasibətlərindən söhbət açdı. O, 1918-ci ildə Şərqdə ilk dəfə Azərbaycanda parlamentli demokratik respublikanın yaranmasını vurğuladı. Ötən əsrin sonunda isə Azərbaycanın ikinci dəfə öz müstəqilliyini bərpa etdikdən sonra həyata keçirilən islahatlar, görülən işlər, iqtisadi nailiyyətlər barədə məlumat verdi, ölkədə mövcud olan multikulturalizm ənənələrindən danışdı.
İşçi qrupun digər üzvləri Asim Mollazadə və Nəsib Məhəməliyev çıxışlarında ölkəmiz üçün çox önəmli məqamda avstraliyalı qonaqların Bakıda olmalarından məmnun olduqlarınıı bildirdilər. Azərbaycanla Avstraliya arasında mövcud olan siyasi, iqtisadi, mədəni əlaqələrdən söhbət açdılar.
Nümayəndə heyətinin rəhbəri, Avstraliya parlamentinin senatoru Bak Kristofer Con səmimi görüş və qonaqpərvərliyə görə minnətdarlığını ifadə etdi. O, vurğuladı ki, Avstraliya-Azərbaycan parlamentlərarası dostluq qrupunun 22 nəfər üzvü var. Bu isə onu göstərir ki, Azərbaycan hər zaman onların rəğbət bəslədikləri bir ölkədir. Ölkələrimiz arasındakı münasibətlərin daha da inkişaf etdirilməsi üçün yaxşı potensial var. Kənd təsərrüfatı və turizm sahəsində əlaqələrin gücləndirilməsi hər iki tərəf üçün olduqca faydalı ola bilər.
Görüşdə Avstraliya - Azərbaycan parlamentlərarası dostluq qrupunun keşmiş sədri, deputat Lyuk Simpkins, parlamentin Nümayəndələr Palatasının üzvü Kell Craig Robert çıxış edərək Azərbaycanda ümumxalq səsverməsinin yüksək səviyyədə keçirildiyini vurğuladılar, prosesdə şəffaf və demokratik bir ab-hava müşahidə etdiklərini diqqətə çatdırdılar.
Görüşdə qarşılıqlı maraq doğuran bir sıra məsələlər barəsində fikir mübadiləsi aparıldı.
Milli Məclisin
Mətbuat xidməti