ARGENTİNA PARLAMENTİNİN NÜMAYƏNDƏLƏRİ MİLLİ MƏCLİSDƏ
Sentyabrın 29-da Milli Məclis Sədrinin müavini, İnsan hüquqları komitəsinin sədri Bahar Muradova V Bakı Beynəlxalq Humanitar Forumunda iştirak etmək üçün ölkəmizdə səfərdə olan Argentina Parlamenti Deputatlar Palatasının 2-ci vitse-spikeri Patrisiya Ximenezin başçılıq etdiyi nümayəndə heyəti ilə görüşdü.
Qonaqları səmimi salamlayan Bahar Muradova Azərbaycan parlamentinin fəaliyyəti, qəbul edilən qanunvericilik aktları, rəhbərlik etdiyi komitənin işi barədə ətraflı məlumat verdi. Qeyd olundu ki, Azərbaycan regionun lider dövlətidir. Müstəqilliyini bərpa etdiyi qısa vaxt ərzində böyük nailiyyətlərə imza atan ölkəmizdə iqtisadi islahatlar uğurla həyata keçirilir. Azərbaycanın Argentina ilə münasibətlərinin yüksək səviyyədə olduğunu deyən Bahar Muradova bu sahədə parlament dostluq qruplarının rolundan söz açdı.
Qonaqlara Azərbaycanın ən ağrılı problemi olan Ermənistan – Azərbaycan Dağlıq Qarabağ münaqişəsi barədə məlumat verən Milli Məclis Sədrinin müavini bu münaqişə nəticəsində bir milyondan artıq insanın öz doğma vətənində məcburi köçkünə çevrildiyini dedi. Bu konfliktin bütün regionun təhlükəsizliyini təhdid altında saxladığını diqqətə çatdırdı. Argentinanın da eyni tipli problem yaşadığını bildirən Bahar Muradova bütün ölkələrin humanitar fəlakətlərin qarşısını almaq üçün beynəlxalq hüquqi dəyərlər uğrunda birləşməli olduğunu vurğuladı.
Səmimi görüş və qonaqpərvərlik üçün minnətdar olduğunu bildirən Argentina Parlamenti Deputatlar Palatasının 2-ci vitse-spikeri Patrisiya Ximenez səfər çərçivəsində Azərbaycanda keçirəcəyi görüşlərin əhəmiyyətli olacağına ümid etdiyini vurğuladı. Xanım qonaq ölkəmizdə müşahidə etdiyi iqtisadi inkişafdan, yenidənqurma və bərpa işlərindən, ekoloji mühitin qorunması sahəsində tərəqqidən məmnunluğunu ifadə etdi və Argentinanın Azərbaycanla iqtisadi və mədəni əməkdaşlığı dərinləşdirməkdə maraqlı olduğunu dedi. O, əlaqələrimizin daha da inkişafı üçün parlament nümayəndə heyətlərinin qarşılıqlı səfərlərin intensivləşməsinin vacibliyini bildirdi.
Görüşdə Azərbaycanın Argentinadakı fövqəladə və səlahiyyətli səfiri Rəşad Aslanov, Argentinanın ölkəmizdəki səfiri Karlos Dante və digər rəsmi şəxslər iştirak edirdilər.
Milli Məclisin
Mətbuat xidməti