MİLLİ MƏCLİSİN SƏDR MÜAVİNİ AFRİKA İTTİFAQININ NÜMAYƏNDƏSİ İLƏ GÖRÜŞDÜ
Sentyabrın 29-da Milli Məclisin Sədr müavini, Təbii ehtiyatlar, energetika və ekologiya komitəsinin sədri Valeh Ələsgərovun ölkəmizdə səfərdə olan Afrika İttifaqının siyasi məsələlər üzrə komissarı xanım Aişə Abdullahi ilə görüşü oldu.
Valeh Ələsgərov qonağı səmimi salamlayaraq vaxtilə Azərbaycanın Afrika İttifaqı ilə təhsil sahəsində əlaqələrinin çox güclü olduğunu vurğuladı. Hazırda Afrika İttifaqı ilə iqtisadi əlaqələrin yüksək səviyyədə olmadığını da təəssüf hissi ilə qeyd etdi. Bunun üçün hər iki tərəfdə yüksək potensialın olduğunu diqqətə çatdırdı. Vitse-spiker Afrika İttifaqına daxil olan 26 ölkə ilə İslam Əməkdaşlıq Təşkilatı çərçivəsində uğurlu əməkdaşlıqdan söhbət açdı və qeyd etdi ki, bu ölkələr hər zaman Azərbaycanın ərazi bütövlüyü məsələlərində dəstək göstərirlər.
V Bakı Beynəlxalq Humanitar Forumunda iştirak məqsədilə ölkəmizə səfər etdiyini deyən Afrika İttifaqının siyasi məsələlər üzrə komissarı Aişə Abdullahi Azərbaycanda gördüyü qonaqpərvərlikdən və keçirdiyi görüşlərdən məmnunluğunu bildirdi. O da öz növbəsində Afrika İttifaqının Azərbaycanla iqtisadi və mədəni sahələrdə əlaqələrin dərinləşdirilməsində maraqlı olduğunu vurğuladı. Təhsil sahəsində bəzi işlərin görüldüyünü diqqətə çatdıran qonaq bildirdi ki, hazırda Bakı Ali Neft Məktəbində və Azərbaycan Diplomatiya Akademiyasında Afrika İttifaqından olan onlarla tələbə təhsil alır.
Söhbətdə qarşılıqlı maraq doğuran bir sıra məsələlər barəsində fikir mübadiləsi aparıldı.
Görüşdə Azərbaycanın Afrika İttifaqı yanında daimi nümayəndəsi Elman Abdullayev iştirak edirdi.
Milli Məclisin
Mətbuat xidməti