Qonağı salamlayan Milli Məclisin AŞPA-dakı nümayəndə heyətinin rəhbəri, Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirdi ki, Avropa Mühafizəkarlar Qrupu həmişə Azərbaycanın mövqeyini müdafiə edib. Azərbaycan 2001-ci ildə Avropa Şurasının üzvü olduqdan sonra biz ilk olaraq Avropa Mühafizəkarlar Partiyası ilə əməkdaşlığa başlamışdıq. Bu partiya həmişə Ermənistan-Azərbaycan, Dağlıq Qarabağ münaqişəsinə obyektiv münasibət göstərmişdir. 

Səməd Seyidov AŞPA-dakı Böyük Britaniya nümayəndə heyətinin də taleyüklü məsələlərdə daim Azərbaycanı dəstəklədiyini qeyd etdi. Bildirdi ki, Azərbaycan Avropa Şurasında çox aktivdir və bizim mövqeyimiz haqlı mövqedir. Biz müharibə yox, sülh istəyirik. Biz heç kimin ərazisini zəbt etməmişik. Əminəm ki, Azərbaycana səfəriniz çərçivəsində keçirəcəyiniz görüşlər bu mənzərəni açıq şəkildə göstərəcək.

    AŞPA-nın Avropa Mühafizəkarları qrupunun sədri Yan Liddel Qringer isə öz növbəsində diqqətə çatdırdı ki, bu onun Azərbaycana ilk səfəridir və bu səfərdən məmnunluq duyur. Qeyd etdi ki, Avropa Mühafizəkarlar Partiyası Azərbaycandakı proseslərdən yaxşı xəbərdardır və Dağlıq Qarabağ münaqişəsinin tezliklə həll olunmasına çalışır.

Qonaq Azərbaycanla əməkdaşlıqdan məmnun olduqlarını və bu əməkdaşlığın bundan sonra da uğurlu olacağına əminliyini ifadə etdi.