UKRAYNA-AZƏRBAYCAN PARLAMENTLƏRARASI DOSTLUQ QRUPUNUN ÜZVLƏRİ MİLLİ MƏCLİSDƏ
Fevralın 20-də Milli Məclisin Ukrayna ilə parlamentlərarası əlaqələr üzrə işçi qrupunun üzvləri ölkəmizdə səfərdə olan Ukrayna Ali Radasının Azərbaycanla parlamentlərarası dostluq qrupunun üzvləri ilə görüşdülər.
Qonaqları səmimi salamlayan millət vəkili, işçi qrupun rəhbəri Rüfət Quliyev ölkələrimizin müxtəlif sahələrdə çoxtərəfli faydalı əməkdalığından geniş söz açdı. Səfərin ikitərəfli münasibətlərimizin möhkəmləndirilməsinə yaxşı töhfə verəcəyinə əminliyini bildirdi. Deputatımız xalqlarımız arasında bir əsrdən artıq hökm sürən tarixi dostluqdan, əlaqələrimizin dərinləşməsində dövlət başçılarının qarşılıqlı görüşlərinin mühüm rolundan danışdı. O, beynəlxalq qurumlardakı birgə əməkdaşlığı da yüksək qiymətləndirərək dedi ki, Ukrayna hər zaman Dağlıq Qarabağ münaqişəsinin nizamlanması məsələsində Azərbaycanın haqlı mövqeyini, suverenliyini və ərazi bütövlüyünü dəstəkləyib. Rüfət Quliyev Ukraynada 300 min soydaşımızın yaşadığını, dost ölkədə onlar üçün bütün lazımi mühitin yaradıldığını, bu ölkənin həmvətənlərimizin dogma evinə çevrildiyini diqqətə çatdırdı.
Ukrayna Ali Radasının Azərbaycanla parlamentlərarası əlaqələr üzrə işçi qrupun rəhbəri Maksim Kuryaçiy səmimi qonaqpərvərlik üçün təşəkkür edərək ölkələrimizin müxtəlif sahələrdəki yüksək əməkdaşlığından geniş söz açdı. Qanunverici orqanlar arasındakı əlaqələri yüksək qiymətləndirən qonaq ölkələrimiz arasında iqtisadi, ticari, mədəni əlaqələrin gücləndirilməsi sahəsində perspektivlərdən danışdı.
Görüşdə Ukraynanın Azərbaycandakı səfiri Aleksandr Mişenko ölkələrimiz arasında diplomatik münasibətlərin inkişafından, millət vəkili, işçi qrupun üzvü Cavid Qurbanov Azərbaycanla Ukrayna arasındakı ticari münasibətlərin durumundan, millət vəkili Elmira Axundova ədəbi əlaqələrimizdən söhbət açdılar.
Görüşdə qarşılıqlı maraq doğuran digər məsələlər barəsində geniş fikir mübadiləsi aparıldı.
Milli Məclisin
Mətbuat xidməti