ABŞ-IN AYDAHO ŞTATININ SENATORU MİLLİ MƏCLİSDƏ OLDU
Mayın 4-də Milli Məclis Sədrinin müavini, parlamentin Təbii ehtiyatlar, energetika və ekologiya komitəsinin sədri Valeh Ələsgərov Bakıda keçirilən IV Ümumdünya Mədəniyyətlərarası Dialoq Forumunda iştirak edən ABŞ-ın Aydaho ştatının senatoru Marv Hagedon ilə görüşdü.
Qonağı səmimi salamlayan Valeh Ələsgərov bildirdi ki, ABŞ-Azərbaycan münasibətlərinin möhkəm təməli var. Bu dövlətin ayrı-ayrı ştatları ilə ölkəmiz arasında qarşılıqlı əlaqələri yüksək dəyərləndirən vitse-spiker hər zaman bu münasibətlərin inkişafında maraqlı olduğumuzu vurğuladı. O, qeyd etdi ki, Azərbaycan bərabərhüquqlu tərəfdaş kimi əməkdaşlığın inkişafına yüksək dəyər verir.
Parlament sədrinin müavini bir neçə il öncə Aydaho ştatında olduğunu dedi, bu bölgənin əsrarəngiz təbiətini, kənd təsərrüfatı və turizm sahəsində imkanlarını yüksək qiymətləndirdi. Qonağa Azərbaycanın həyata keçirdiyi transmilli layihələr barədə ətraflı məlumat verən vitse-spiker neft, qaz, nəqliyyat sahəsində uğurlarımızdan söhbət açdı.
ABŞ-ın Aydaho ştatının senatoru Marv Hagedon Azərbaycanla bağlı yüksək təəssüratlarını bölüşdü. Qonaq qeyd etdi ki, Aydaho gənc dövlətdir. Azərbaycanın böyük sərvəti olan neft, qaz ehtiyatlarının istismar edilməsi sahəsində təcrübəsi öyrənməlidir. Qonaq Bakıda keçirilən IV Ümumdünya Mədəniyyətlərarası Dialoq Forumunun işini yüksək qiymətləndirdi və ölkəmizi böyük mədəniyyətlərin məhək daşı adlandırdı.
Görüşdə qarşılıqlı maraq doğuran bir sıra məsələlər barəsində fikir mübadiləsi aparıldı.
Milli Məclisin
Mətbuat xidməti