AVROPA PARLAMENTİ XARİCİ ƏLAQƏLƏR KOMİTƏSİNİN SƏDRİ PARLAMENTDƏ OLDU
Mayın 22-də Milli Məclisin Beynəlxalq münasibətlər və parlamentlərarası əlaqələr komitəsinin sədri, parlamentin AŞPA-dakı nümayəndə heyətinin rəhbəri Səməd Seyidov ölkəmizdə səfərdə olan Avropa Parlamentinin (AP) Xarici əlaqələr komitəsinin sədri Devid MakAlisterin başçılıq etdiyi AP təmsilçiləri ilə görüşdü.
Qonaqları salamlayan Səməd Seyidov Azərbaycanın Avropa Şurası qarşısında götürdüyü öhdəlikləri layiqincə yerinə yetirməsindən, Avropa İttifaqı ilə əməkdaşlığın mövcud durumundan söz açdı. O, Azərbaycanın regionda böyük nüfuza sahib dövlət olduğunu ölkəmizin bir sıra məsələlərdə bütün dünya üçün nümunə olduğunu vurğuladı. Qeyd olundu ki, Azərbaycan Avropa İttifaqı və Avropa Parlamenti ilə münasibətlərini qarşılıqlı hörmət, anlaşma əsasında davam etdirməyə, bunun üçün hər zaman açıq fikir mübadiləsi aparmağa hazırdır.
Devid MakAlister ölkəmizdə İslam Həmrəyliyi Oyunları çərçivəsində qonaqlar üçün yaradılan şəraitdən, göstərilən qonaqpərvərlikdən məmnunluğunu ifadə etdi. Azərbaycanda keçirdikləri görüşlərin əməkdaşlığımızın dərinləşməsində xüsusi əhəmiyyəti olacağını diqqətə çatdırdı. Qonaq parlamentlərarası münasibətlərin dərinləşməsinin yaxşı nəticə ilə yekunlaşacağına, bu münasibətlərin xalqlarımızın ümumi maraqlarına xidmət edəcəyinə ümidvar olduğunu bildirdi.
Söhbətdə qurumla ölkəmiz arasında əməkdaşlığın perspektivləri, Dağlıq Qarabağ münaqişəsinin həlli yolları, regionda və dünyada sülhün bərqərar olması üçün atılan addımlar, bu istiqamətdə səylərin gücləndirilməsi və qarşılıqlı maraq doğuran digər məsələlər ətrafında fikir mübadiləsi aparıldı.
Görüşdə Milli Məclisin deputatları Fuad Muradov, Cavanşir Feyziyev və digər rəsmi şəxslər iştirak edirdilər.
***
Görüşdən sonra Beynəlxalq münasibətlər və parlamentlərarası əlaqələr komitəsinin sədri, parlamentin AŞPA-dakı nümayəndə heyətinin rəhbəri Səməd Seyidov və Avropa Parlamentinin Xarici əlaqələr komitəsinin sədri Devid MakAlisterin iştirakı ilə jurnalistlər üçün brifinq keçirildi.
Brifinqdə Devid MakAlister ölkəmizdə keçirilən görüşlər, səfər müddətində aldığı təəssüratlar barədə jurnalistlərə geniş məlumat verdi.
Sonra Devid MakAlister və Səməd Seyidov KİV nümayəndələrini maraqlandıran suallara ətraflı cavablar verdilər.
Milli Məclisin
Mətbuat xidməti