BOLQARISTAN PARLAMENT NÜMAYƏNDƏ HEYƏTİ MİLLİ MƏCLİSDƏ
İyunun 30-da Milli Məclisin Bolqarıstanla parlamentlərarası əlaqələr üzrə işçi qrupu üzvlərinin ölkəmizdə səfərdə olan Bolqarıstan parlamentinin Büdcə və Maliyyə üzrə komissiyanın sədri Menda Stojanovanın başçılıq etdiyi nümayəndə heyəti ilə görüşü oldu.
Milli Məclisin Əmək və sosial siyasət komitəsinin sədr müavini, işçi qrupun rəhbəri Rauf Əliyev bildirdi ki, Azərbaycan müstəqilliyini bərpa etdikdən sonra ölkələrimiz arasındakı əlaqələr yeni müstəvidə inkişaf edib. Biz bir çox sahələrdə, xüsusən də beynəlxalq təşkilatlarda səmərəli əməkdaşlıq edirik. O, qonaqlara parlamentin fəaliyyəti, qəbul edilən sosialyönümlü qanunlar barədə ətraflı məlumat verdi.
Sonra Rauf Əliyev Dağlıq Qarabağ münaqişəsi barədə danışdı. Qeyd edildi ki, münaqişə nəticəsində bir milyondan artıq soydaşımız öz ölkəsində qaçqın və məcburi köçkün həyatı yaşayır. Bu problem nəinki Azərbaycanın, bütövlükdə regionun təhlükəsizliyini təhdid edir. Ermənistan problemin nizamlanması ilə bağlı BMT-nin, Avropa Şurasının qəbul etdiyi qətnamələrə məhəl qoymur.
Görüş üçün minnətdarlığını bildirən Menda Stojanova parlament müstəvisində fəal əməkdaşlığımızdan söz açdı. Əlaqələrimizin daha da inkişaf etdirilməsi üçün geniş potensialın mövcud olduğunu dedi. İqtisadi əlaqələrdən danışan qonaq ildən-ilə ticarət dövriyyəsinin artdığını dilə gətirdi. İndiyə qədər ölkələrimiz arasında 70-dən artıq sənədin imzalandığını bildirdi. Ölkəmizə dəfələrlə səfər etdiyini deyən xanım qonaq Azərbaycanın çox zəngin təbii ehtiyatlara malik olduğunu qeyd etdi.
Söhbətdə qarşılıqlı maraq doğuran bir sıra məsələlər barədə fikir mübadiləsi aparıldı.
Görüşdə Milli Məclisin deputatları Ağacan Abiyev, Xanlar Fətiyev, Mahir Aslanov, Bolqarıstanın Azərbaycandakı səfiri Maya Xristova və digər rəsmi şəxslər iştirak edirdilər.
Milli Məclisin
Mətbuat xidməti