ATƏT PA-nın XÜSUSİ NÜMAYƏNDƏSİ MİLLİ MƏCLİSDƏ
Sentyabrın 26-da Milli Məclisin Beynəlxalq münasibətlər və parlamentlərarası əlaqələr komitəsinin üzvləri ölkəmizdə səfərdə olan ATƏT Parlament Assambleyasının Cənubi Qafqaz üzrə xüsusi nümayəndəsi Kristian Vigeninlə görüşdülər.
Qonaqları komitənin sədr müavini Sevinc Fətəliyeva salamlayaraq Azərbaycanın beynəlxalq qurumlarla əlaqələrinin inkişafından son zamanlar bu münasibətlərin dərinləşməsindən danışdı. Bildirildi ki, beynəlxalq qurumların Azərbaycanla bağlı qəbul etdikləri sənədlər bəzi hallarda reallığı əks etdirmir. Azərbaycan regionun ən stabil, ən inkişaf etmiş lider dövlətidir. Ölkəmiz bu nailiyyətlərə çox mürəkkəb şəraitdə nail olub. 25 ildən artıqdır ki, xalqımız Ermənistan-Azərbaycan Dağlıq Qarabağ münaqişəsinin yaratdığı ağrılı problemlərlə mübarizə aparır. Torpaqlarımızın 20 faizi Ermənistan silahlı qüvvələrinin işğalı altındadır. 1 milyondan artıq soydaşımız öz doğma el-obasından qaçqın və məcburi köçkünə çevrilib. Komitə sədrinin müavini onu da vurğuladı ki, ATƏT-in Minsk qrupu sırf bu münaqişə ilə əlaqədar yaradılsa da, konkret mövqe nümayiş etdirmir.
Sevinc Fətəliyeva Dağlıq Qarabağ münaqişəsinin “dondurulmuş münaqişə” adlandırılmasına da etirazını bildirdi. Qeyd etdi ki, cəbhəyanı təmas xəttində erməni silahlı qüvvələri tərəfindən hər gün təxribat xarakterli hadisələr baş verir. Əsgərlərimizn və mülki vətəndaşlarımızın öldürülməsinin ardı-arası kəsilmir. Bunlara son qoyulmalıdır.
Ətraflı məlumat üçün təşəkkürünü bildirən Kristian Vigenin Azərbaycan haqqında ətraflı bilgilərə malik olduğunu qeyd etdi. Sentyabrın 25-də Zəngilan rayonundan qaçqın düşmüş insanlarla keçirdiyi görüşün onda böyük təəssürat oyatdığını vurğuladı. Qonaq vurğuladı ki, olduqca təsirli keçən görüşümüzdə bu insanların çəkdikləri ağrı-acını öyrəndim. Çox təsirləndim. O, münaqişənin tezliklə sülh yolu ilə beynəlxalq hüquq normalarına uyğun şəkildə həll ediləcəyinə ümidvar olduğunu dedi.
Söhbətdə Milli Məclisin deputatları Sahibə Qafarova, Bəxtiyar Əliyev, Azər Kərimli və digər rəsmi şəxslər iştirak edirdilər.
Görüşdə qarşılıqlı maraq doğuran digər məsələlər ətrafında fikir mübadiləsi aparıldı.
Milli Məclisin
Mətbuat xidməti