MİLLİ MƏCLİSDƏ GÖRÜŞ
Oktyabrın 23-də Milli Məclis Sədrinin müavini Valeh Ələsgərov ölkəmizdə səfərdə olan Çex Respublikası Senatının sədr müavini Yirji Şestakın başçılıq etdiyi nümayəndə heyəti ilə görüşdü.
Ölkələrimiz arasındakı əlaqələrdən söz açan Valeh Ələsgərov səfərin əhəmiyyətini yüksək dəyərləndirdi. Qeyd etdi ki, səfər çərçivəsində Bakıda keçiriləcək görüşlər və aparılacaq danışıqlar mövcud münasibətlərin daha yüksək səviyyəyə qalxmasına təkan verəcək. Vitse-spiker bildirdi ki, Azərbaycanla Çexiya arasında istər parlament, istərsə də hökumət səviyyəsində əlaqələr ildən-ilə inkişaf edir. Münasibətlərin dərinləşməsində parlamentlərarası dostluq qruplarının da rolu var.
Görüşdə nümayəndə heyətinin başçısı Yirji Şestak Azərbaycana səfərdən məmnunluqlarını bildirdi. Mövcud əməkdaşlıq əlaqələrini daha da dərinləşdirmək və genişləndirmək niyyətində olduqlarını dedi. Çexiya ilə Azərbaycan arasında strateji tərəfdaşlığa dair dövlət başçılarının imzaladığı sənədi yada saldı. Siyasi əlaqələrlə yanaşı iqtisadi sahədə əməkdaşlığın da inkişafını istədiklərini bildirdi.
Söhbət zamanı Azərbaycanla əməkdaşlıq edən Çex şirkətlərindən də bəhs olundu. Bu əməkdaşlığın dərinləşdirilməsi vacibliyi vurğulandı. Qarşılıqlı maraq doğuran bir sıra məsələlər, xüsusilə də Azərbaycanla əməkdaşlığın inkişaf perspektivləri barədə geniş fikir mübadiləsi aparıldı.
Görüşdə Milli Məclisin komitə sədrləri Eldar İbrahimov və Ziyad Səmədzadə, Çexiya ilə parlamentlərarası əlaqələr üzrə işçi qrupun üzvləri Sədaqət Vəliyeva, Ülviyyə Ağayeva, Kamilə Əliyeva və Kamran Nəbizadə iştirak edirdilər.
Milli Məclisin
Mətbuat xidməti