PARLAMENTİN BEYNƏLXALQ ƏLAQƏLƏRİ GÜCLƏNİR
Yanvarın 29-da Milli Məclis Sədrinin müavini, Təbii ehtiyatlar, energetika və ekologiya komitəsinin sədri Valeh Ələsgərov ölkəmizdə səfərdə olan Parlamentlərarası İttifaqda “12 Plyus Geosiyasi Qrupu”nun katibi, portuqaliyalı deputat Duarte Paçeko ilə görüşdü.
Qonağı səmimi salamlayan Valeh Ələsgərov ölkəmizdəki ictimai-siyasi vəziyyət, söz və mətbuat azadlığı, tolerant mühit, demokratiyanın təməl prinsiplərinin və insan hüquqlarının qorunması barədə ətraflı söhbət açdı.
Vitse-spiker qonağa Azərbaycanın ən ağrılı problemi olan Ermənistan-Azərbaycan, Dağlıq Qarabağ münaqişəsi ilə bağlı məlumat verdi. Bu münaqişənin nəinki ölkəmizi, eləcə də regionu ciddi təhdid altında saxladığını vurğuladı. Ermənistanın işğalı nəticəsində 20 faiz torpaqlarımızın zəbt olunduğunu, 1 milyondan artıq soydaşımızın öz dogma yurd-yuvasında qaçqın və məcburi köçkünə çevrildiyini dedi. Valeh Ələsgərov bəzən beynəlxalq təşkilatların ölkəmizə ikili standartlardan yanaşdığını da diqqətə çatdırdı və Avropa ailəsinin üzvü olan Azərbaycan üçün bunun yolverilməz olduğunu vurğuladı.
Portuqaliyalı deputat Duarte Paçeko Parlamentlərarası İttifaqda “12 Plyus Geosiyasi Qrupu” barədə ətraflı məlumat verdi. Bildirdi ki, “12 Plyus Geosiyasi Qrupu” tamlıqla Qərb modelinə əsaslanan bir qurumdur. Qrup insan hüquqları, demokratiya, qanunun aliliyi prinsiplərinə həssaslıqla yanaşır.
Görüşdə qarşılıqlı maraq doğuran bir sıra məsələlər barəsində fikir mübadiləsi aparıldı.
Milli Məclisin
Mətbuat xidməti