AQRAR SİYASƏT KOMİTƏSİNDƏ GÖRÜŞ
Fevralın 21-də Milli Məclisin Aqrar siyasət komitəsinin sədri Eldar İbrahimov Avstriya Respublikasının Federal Nəqliyyat, İnnovasiya və Texnologiya Nazirliyinin Baş katibi Andreas Rayxhartın başçılıq etdiyi nümayəndə heyəti ilə görüşdü.
Qonağı səmimi salamlayan Eldar İbrahimov ölkəmizin 1991-ci ildə müstəqillik qazandıqdan sonra keçdiyi inkişaf yolundan danışdı. Ümummilli lider Heydər Əliyevin Avstriya dövləti ilə çox gözəl münasibətlərin təməlini qoyduğunu, bu gün Azərbaycan Prezidenti İlham Əliyev tərəfindən bu ənənənin uğurla davam etdirildiyini vurğuladı. Komitə sədri münasibətlərimizin inkişafında parlamentlərarası dostluq qruplarının önəmini qeyd etdi və özünün də üzvü olduğu Milli Məclisin Avstriya parlamenti ilə dostluq qrupunun fəaliyyətini yüksək qiymətləndirdi.
Sonra Eldar İbrahimov Azərbaycanda kənd təsərrüfatının inkişafindan söz açdı. Son 14 ildə ölkəmizdə aparılan iqtisadi islahatlardan, aqrar sahənin sürətli dirçəlişindən danışdı. Bildirdi ki, bu gün kənd təsərrüfatı sahəsi bütövlükdə vergidən azaddır. Bu illər ərzində sahibkarlığın inkişafı ilə əlaqədar kənd təsərrüfatı sahəsinə dövlət tərəfindən 2 milyard manat güzəştli subsidiya ayrılıb. Regionların inkişafı və ərzaq təhlükəsizliyi ilə bağlı dövlət proqramları həyata keçirilir. Bu gün Azərbaycan yalnız taxıl məhsulu istisna olmaqla bütün ölkə əhalisini kənd təsərrüfatı məhsulları ilə özü təmin edir və ötən il 502 milyon manatlıq kənd təsərrüfatı məhsulu ixrac edilib.
Nümayəndə heyətinin rəhbəri, Avstriya Federal Nəqliyyat, İnnovasiya və Texnologiya Nazirliyinin Baş katibi Andreas Rayxhart Azərbaycanda keçirdikləri görüşlərdən yüksək təəssürat aldıqlarını dilə gətirdi. Qonaq Avstriyanın kənd təsərrüfatı sahəsində qazandığı nailiyyətlərdən və Azərbaycanla ortaq layihələrdə iştirak imkanlarından ətraflı söhbət açdı.
Söhbətdə qarşılıqlı maraq doğuran bir sıra məsələlər barəsində fikir mübadiləsi aparıldı.
Görüşdə millət vəkilləri Eldar Quliyev, Novruz Aslan, Eldəniz Səlimov, hər iki ölkədəki səfirlər Qalib İsrafilov, Aksel Vex və digər rəsmi şəxslər iştirak edirdilər.
Milli Məclisin
Mətbuat xidməti