ATƏT PA SƏDRİ MİLLİ MƏCLİSDƏ
Martın 12-də Milli Məclisin ATƏT Parlament Assambleyasındakı daimi nümayəndə heyətinin üzvləri ölkəmizdə səfərdə olan qurumun sədri Georgi Seretelinin başçılıq etdiyi nümayəndə heyəti ilə görüşdülər.
Qonaqları salamlayan Milli Məclis Sədrinin müavini, təşkilatda nümayəndə heyətimizin rəhbəri Bahar Muradova ATƏT-Azərbaycan əməkdaşlığından ətraflı söhbət açdı. Qeyd olundu ki, ölkəmiz ATƏT-in bərabərhüquqlu üzvü olmaqla yanaşı təşkilatın dəyərlərinin fəal təbliğatçısıdır. Bildirildi ki, son zamanlar ATƏT çərçivəsində keçirilən tədbirlərdə Azərbaycan nümayəndə heyətinin təklifləri böyük diqqətlə dinlənilir. Bahar Muradova buna görə təşkilat rəhbərliyinə minnətdarlığını ifadə etdi. Ümumi hədəflərə nail olmaq üçün qurumla əməkdaşlığın dərinləşdirilməsinin faydalı olduğu diqqətə çatdırıldı.
Sonra vitse-spiker aprelin 11-də Azərbaycanda keçiriləcək prezident seçkilərinə hazırlıqlarla bağlı məlumat verdi. Şəffaf, ədalətli və demokratik seçkilərin keçirilməsi üçün ölkədə hər cür şəraitin yaradıldığını bildirdi. ATƏT-in müşahidəçi missiyasının seçkiləri izləyəcəyindən məmnunluq duyduğunu dedi.
ATƏT Parlament Assambleyasının sədri Georgi Sereteli səmimi görüş və qonaqpərvərlik üçün minnətdarlığını bildirdi. Qonaq gürcü xalqının nümayəndəsi kimi Bakıda hər zaman özünü öz evindəki kimi hiss etdiyini xüsusi fərəh hissi ilə bəyan etdi. Bu dəfə ölkəmizə ATƏT-in İpək Yoluna Dəstək Qrupunun Bakıda keçiriləcək “İpək Yolu boyunca iqtisadi əməkdaşlıq və mədəni əlaqələrin inkişaf etdirilməsində parlamentlərin rolu” mövzusunda konfransında iştirak etmək məqsədi ilə gəldiklərini dedi. O, Azərbaycanın ATƏT üçün ən dəyərli ölkələrdən biri olduğunu dedi və münasibətlərin uğurlu davamına təkan verməkdə, əməkdaşlığımızın daha da möhkəmlənməsində maraqlı olduqlarını vurğuladı.
Görüşdə ATƏT PA-nın Baş katibi Roberto Mantella, qurumun İqtisadi məsələlər, Elm, Texnologiya və Ətraf mühit komitəsinin sədri, Azərbaycanda seçkiləri müşahidə missiyasının rəhbəri Nilza de Sena, ATƏT PA-nın vitse-spikeri, millət vəkili Azay Quliyev, deputatlardan Kamran Nəbizadə, Tahir Mirkişili, Elşad Həsənov, Ülviyyə Ağayeva və digər rəsmi şəxslər iştirak edirdilər.
Söhbətdə qarşılıqlı əhəmiyyət kəsb edən bir sıra məsələlər barəsində fikir mübadiləsi aparıldı.
Milli Məclisin
Mətbuat xidməti