VİKTOR PAUL DOBRE: “Azərbaycan-Rumıniya arasında əməkdaşlığın inkişaf potensialı genişdir”
Martın 15-də Milli Məclisin Rumıniya parlamenti ilə əlaqələr üzrə işçi qrupunun üzvləri ölkəmizdə səfərdə olan Rumıniya Deputatlar Palatasının üzvü, Rumıniya-Azərbaycan dostluq qrupunun rəhbəri Viktor Paul Dobrenin başçılıq etdiyi nümayəndə heyəti ilə görüşdü.
Millət vəkili, Azərbaycan-Rumıniya parlamentlərarası əlaqələr üzrə işçi qrupunun rəhbəri Azay Quliyev iki ölkə arasındakı dostluq münasibətlərindən söz açdı. Qeyd edildi ki, Azərbaycan və Rumıniya münasibətləri daim yüksələn xəttlə inkişafdadır. Rumıniya 11 ölkə ilə strateji tərəfdaşlıq aktı imzalayıb ki, onlardan biri də Azərbaycandır. Azay Quliyev hər iki ölkə deputatlarının beynəlxalq qurumlardakı birgə fəaliyyətinin xüsusi əhəmiyyətindən də danışdı.
Qonaqlara Dağlıq Qarabağ münaqişəsinin hazırkı durumu barədə məlumat verən işçi qrupun rəhbəri hər zaman Azərbaycanın haqlı mövqeyini dəstəklədiklərinə görə dost Rumıniya dövlətinin rəhbərliyinə minnətdarlığını bildirdi.
Rumıniya Deputatlar Palatasının üzvü, Rumıniya-Azərbaycan dostluq qrupunun rəhbəri Viktor Paul Dobre səmimi görüş və qonaqpərvərliyə görə təşəkkürünü bildirdi. O, Azərbaycanın bölgədə iqtisadi-siyasi baxımdan ən sabit və inkişaf etmiş dövlət olduğunu vurğuladı. Qonaq bildirdi ki, Rumıniya ilə əlaqələrin başlanğıcı Azərbaycanın müstəqillik əldə etdiyi ilk illərdən başlayıb və artıq bu dostluq münasibətləri 25 ilə yaxındır davam edir. Rumıniya Azərbaycanın müstəqilliyini tanıyan ilk ölkələrdən biridir. Qeyd edildi ki, ölkələrimiz arasında əməkdaşlığın inkişaf potensialı genişdir.
Görüşdə millət vəkilləri, işçi qrupun üzvləri Fəzail İbrahimli, Musa Quliyev, Mirkazım Kazımov, Qənirə Paşayeva, Rumıniya parlamentinin deputatları Georgi Dinu Socotar, İon Hadarca, İancu Caracota və digər rəsmi şəxslər iştirak edirdilər.
Söhbət zamanı Azərbaycan-Rumıniya əlaqələrinin gələcək inkişaf perspektivləri və qarşılıqlı maraq doğuran digər məsələlər ətrafında fikir mübadiləsi aparıldı.
Milli Məclisin
Mətbuat xidməti