MİLLİ MƏCLİSDƏ GÖRÜŞ
İyulun 5-də Milli Məclis Sədrinin birinci müavini, Təhlükəsizlik və müdafiə komitəsinin sədri, NATO Parlament Assambleyasında nümayəndə heyətimizin rəhbəri Ziyafət Əsgərov qurumun Baş Katibinin Cənubi Qafqaz və Mərkəzi Asiya üzrə xüsusi nümayəndəsi Ceyms Appaturayla görüşdü.
Görüşdə Ziyafət Əsgərov Azərbaycan-NATO münasibətlərinin dinamik inkişaf etdiyini söylədi. Bildirildi ki, ölkəmiz qurumla Sülh Naminə Əməkdaşlıq və Fərdi Tərəfdaşlıq proqramları çərçivəsində əməkdaşlıq edir, terrorizmə qarşı mübarizədə Alyansa dəstək verir. Azərbaycan sülhməramlıları Əfqanıstanda uğurla xidmət aparırlar. Ölkəmiz Avropanın enerji təhlükəsizliyində mühüm rol oynayır.
Söhbətdə Milli Məclis Sədrinin birinci müavini Ziyafət Əsgərov Ermənistanın işğalçılıq siyasəti, Dağlıq Qarabağ problemi, bir milyondan çox azərbaycanlının pozulmuş hüquqlarından danışaraq NATO-nu bu məsələdə ədalətli, BMT Təhlükəsizlik Şurasının qətnamələrinin həyata keçirilməsində fəal olmağa çağırdı.
NATO Baş katibinin Cənubi Qafqaz və Mərkəzi Asiya üzrə xüsusi nümayəndəsi Ceyms Appaturay qurumla ölkəmizin münasibətlərini yüksək qiymətləndirərək, bundan sonra əməkdaşlığın daha da inkişaf edəcəyinə ümüdvar olduğunu bildirdi.
Söhbətdə tərəfləri maraqlandıran məsələlər ətrafında fikir mübadiləsi aparıldı.
Görüşdə ölkəmizin NATO yanında daimi nümayəndəsi Xəzər İbrahim və digər rəsmi şəxslər iştirak edirdilər.
Milli Məclisin
Mətbuat xidməti