AZƏRBAYCAN – ALMANİYA ƏLAQƏLƏRİ GENİŞLƏNİR
Sentyabrın 19-da Milli Məclis Sədrinin müavini Bahar Muradova ölkəmizdə səfərdə olan Almaniya Bundestaqının deputatı Viola von Kramon-Taubadelin başçılıq etdiyi nümayəndə heyəti ilə görüşdü.
Qonaqları salamlayan Bahar Muradova Azərbaycanla Almaniya arasında əlaqələrin qədim tarixi köklərinin olduğunu, bu gün isə əlaqələrin yüksələn xətlə inkişaf etdiyini qeyd etdi. Bildirildi ki, tarixin müxtəlif vaxtlarında xalqlarımızı birləşdirən ümumi dəyərlər çox olmuşdur və bu dəyərlərin qorunması, möhkəmlənməsi sevindirici haldır. Bahar Muradova daha sonra Almaniyanın inkişaf etmiş, Azərbaycanın isə inkişaf etməkdə olan ölkə olduğunu diqqətə çatdırdı. Respublikamızın dinamik inkişafı, qısa müddətdə əldə olunan uğurlar tezliklə bizim də inkişaf etmiş dövlətlər sırasına qoşulacağımızı söyləməyə əsas verir. Bu gün Azərbaycanın qarşısında duran ən böyük hədəf də məhz budur. Bu inkişaf prosesində bizim əsaslandığımız dəyərlər demokratiya, insan haqları, tolerantlıq, söz və vicdan azadlığı ənənələrinin möhkəmlənməsidir. Vitse-spiker bildirdi ki, ölkəmiz daha çox öz sərvətlərini insan potensialını reallaşdırmaq üçün sərf edir. Bu istiqamətdə dost ölkələrin, o cümlədən Almaniyanın çoxillik təcrübəsi bizim üçün çox əhəmiyyətlidir. Bahar Muradova parlament nümayəndə heyətlərimizin beynəlxalq təşkilatlarda, həmçinin ATƏT PA-da uğurlu əməkdaşlığından söz açdı, bir çox məqamlarda mövqelərimizin üst-üstə düşdüyünü vurğuladı. O, Almaniyanın İPS – Beynəlxal Parlament Təqaüdü Proqramı çərçivəsində azərbaycanlı gənclərə xüsusi yer ayırdığına görə minnətdarlığını bildirdi. Bu proqramın əlaqələrimizin güclənməsində önəmli rolu olduğundan danışdı.
Vitse-spiker qonağa Dağlıq Qarabağ münaqişəsi ilə bağlı mövcud vəziyyət barədə ətraflı məlumat verdi. Bildirildi ki, Ermənistanın 20 faiz torpaqlarımızı işğal altında saxlaması, 1 milyon soydaşımızın yurd-yuvasından digərgin düşməsi, qaçqın həyatı yaşaması bölgənin inkişafına və təhlükəsizliyinə böyük maneə törədir.
Səmimi görüş və ətraflı məlumat üçün təşəkkürünü bildirən Viola von Kramon-Taubadel Azərbaycanla Almaniya arasındakı münasibətlərin hazırkı səviyyəsini yüksək qiymətləndirdi. O, qeyd etdi ki, bu əlaqələrin daha geniş inkişafı üçün hər cür imkan vardır. Azərbaycanın öz təbii sərvətlərini insan kapitalına yönəltməsini alqışlayan xanım Kramon-Taubadel bu istiqamətdə qarşıya qoyulacaq məqsədlərin uğurla reallaşacağına əminliyini ifadə etdi.
Almaniyalı deputat İPS – Beynəlxal Parlament Təqaüdü Proqramı çərçivəsində təhsil alan həmyerlilərimizə hər cür dəstək verməyə hazır olduqlarını vurğuladı. Azərbaycanın sürətli inkişafından söz açan qonaq bu günlərdə Bakıda start götürəcək yeniyetmə qızlar arasında futbol üzrə dünya çempionatının bu inkişafın göstəricisi olduğunu da bildirdi.
Söhbətdə Dağlıq Qarabağ münaqişəsindən danışan qonaq problemin ədalətli həllinə tərəfdar olduğunu ifadə etdi.
Görüşdə qarşılıqlı maraq doğuran bir sıra məsələlər ətrafında fikir mübadiləsi aparıldı.
Milli Məclisin
Mətbuat xidməti