Oktyabrın 6-da Moldovanın Kişinyov şəhərində MDB Parlamentlərarası Assambleyasının Hüquq məsələləri üzrə daimi komissiyasının iclası keçiriləcək. İclasda Milli Məclisin deputatı Hacı Salayev bu komissiyanın sədr müavini kimi iştirak edəcəkdir.
Tədbirdə “Firma adları haqqında”, “Ticarət sirri haqqında”, “MDB iştirakçısı olan ölkələrin Dünya Ticarət Təşkilatı çərçivəsində qarşılıqlı fəaliyyətinin hüquqi təminatı haqqında” və “Mübahisələrin məhkəmədən kənar həlli haqqında” model qanun layihələri müzakirə olunacaqdır.
İclasda Hacı Salayev çıxış edəcək, müzakirə olunan qanun layihələrinə münasibət bildirəcəkdir.

Milli Məclisin
Mətbuat xidməti