Oktyabrın 19-da Milli Məclisdə Azərbaycan-Türkiyə parlamentlərarası işçi qrupunun üzvləri Türkiyənin ölkəmizdəki səfiri İsmayıl Alpər Coşqun ilə görüşdülər.
Görüşdə iki qardaş ölkə arasında əlaqələrin daha da inkişaf etdirilməsində və möhkəmlənməsində parlamentlərin rolundan, işçi qruplarının fəaliyyətindən, deputatlarımızın beynəlxalq təşkilatlarda xalqlarımız və dövlətlərimiz üçün mühüm əhəmiyyət kəsb edən məsələlərdə eyni mövqedən çıxış etmələrindən söhbət açıldı.
Söhbət zamanı Türkiyənin ölkəmizdəki səfiri İsmayıl Alpər Coşqun, Milli Məclisin Azərbaycan-Türkiyə parlamentlərarası işçi qrupunun rəhbəri Nizami Cəfərov və digər millət vəkilləri ölkələrimiz arasında əlaqələrin inkişafı perspektivləri ilə bağlı fikirlərini bölüşdülər.
Deputatlar yeni səfirə işində uğurlar arzuladılar, onun üzərinə düşən vəzifələri layiqincə yerinə yetirəcəyinə əminliklərini ifadə etdilər. 

Milli Məclisin
Mətbuat xidməti