TİKA NÜMAYƏNDƏLƏRİ MİLLİ MƏCLİSDƏ
Noyabrın 6-da Milli Məclisin Türkiyə ilə parlamentlərarası əlaqələr üzrə işçi qrupu üzvlərinin ölkəmizdə səfərdə olan Türk İşbirliyi və Koordinasiya Agentliyinin (TİKA) rəhbəri Sərdar Çamın başçılıq etdiyi nümayəndə heyəti ilə görüşü oldu.
Qonaqları Azərbaycan parlamentində salamlamaqdan xüsusi məmnunluq duyduğunu bildirən Milli Məclisin Mədəniyyət komitəsinin sədri, işçi qrupun rəhbəri Nizami Cəfərov böyük türk dünyasının təmsilçisi olan hər iki xalqın eyni dinə, eyni tarixi və milli adət-ənənələrə malik olduğunu dedi. O, dostluq qruplarının fəaliyyətindən, xalqlarımızın birliyindən, milli-mənəvi dəyərlərimizdən geniş söhbət açdı, ortaq türk dilində dərsliklərin hazırlanması sahəsində görülən işlərdən danışdı.
Görüşdə millət vəkilləri Qənirə Paşayeva, Məlahət İbrahimqızı, Jalə Əliyeva iki qardaş xalq arasında olan münasibətlərimizin gələcək inkişaf perspektivləri, nəzərdə tutulan yeni qarşılıqlı layihələr barədə öz fikirlərini açıqladılar.
TİKA-nın rəhbəri Sərdar Çam səmimi görüş üçün minnətdarlığını bildirdi. O, ulu öndər, Azərbaycan xalqının ümummilli lideri Heydər Əliyevin “Bir millət, iki dövlət!” deyiminin Türkiyədə dillər əzbəri olduğunu qeyd etdi. Sonra görüşdə qarşılıqlı maraq doğuran digər məsələlər müzakirə edildi.
Milli Məclisin
Mətbuat xidməti