MİLLİ MƏCLİSDƏ GÖRÜŞ
Yanvarın 9-da Milli Məclis Sədrinin birinci müavini, Təhlükəsizlik və müdafiə komitəsinin sədri Ziyafət Əsgərov ölkəmizdə səfərdə olan Finlandiya parlamentinin nümayəndə heyəti ilə görüşdü.
Qonaqları Azərbaycan parlamentində salamlamaqdan məmnunluq duyduğunu bildirən Ziyafət Əsgərov qeyd etdi ki, Azərbaycanla Finlandiya arasında münasibətlərin intensivləşməsi vacibdir və iki ölkə habelə parlamentlərarası əlaqələrin inkişafı üçün belə səfərlərin böyük əhəmiyyəti var. Ölkəmizin demokratik dəyərlərə böyük önəm verdiyini qeyd edən birinci vitse-spiker parlamentin fəaliyyəti, rəhbərlik etdiyi komitənin işi, ölkəmizdə həyata keçirilən islahatlar, vətəndaş cəmiyyətinin inkişafı barədə qonaqlara ətraflı məlumat verdi. Bildirildi ki, ölkəmiz müstəqillik qazanandan bu günə qədər parlamentdə 3 mindən artıq qanun qəbul edilib.
Daha sonra Ermənistan - Azərbaycan, Dağlıq Qarabağ münaqişəsi barədə ətraflı söhbət açan Ziyafət Əsgərov qonaqların diqqətinə çatdırdı ki, Azərbaycanın 20 faiz torpağı hələ də erməni silahlı qüvvələri tərəfindən işğal altında saxlanılır. 20 ildən artıqdir ki, 1 milyondan artıq vətəndaş öz döğma yurd-yuvasından didərgin düşüb. Ermənistan isə problemin sülh yolu ilə həlli istiqamətində atılan addımlara etinasız yanaşır. Bu problemin həlli ilə bağlı BMT Təhlükəsizlik Şurasının, Avropa Parlamentinin, Avropa Şurasının və digər nüfuzlu beynəlxalq təşkilatların qəbul etdiyi bütün qətnamə və qərarlara məhəl qoymur. Bu problemin həlli istiqamətində görülən işlərdən danışan Ziyafət Əsgərov qeyd etdi ki, Azərbaycan öz torpaqlarını hərbi yolla azad etmək iqtidarında olsa da, məsələnin beynəlxalq hüquq norma və prinsiplərinə uyğun şəkildə, ədalətli həllinə tərəfdardır.
Finlandiya parlamentinin deputatı İlkka Kanerva səmimi görüşə və ətraflı məlumata görə minnətdarlığını bildirdi. Qonaq qeyd etdi ki, Azərbaycan Cənubi Qafqazda çox güclü geostrateji mövqeyə malikdir. O, Finlandiyanın Dağlıq Qarabağ münaqişəsinin ədalətli, beynəlxalq hüquq normaları prinsiplərinə uyğun şəkildə həllinə tərəfdar olduğunu dedi. Səfər müddətində ölkəmizin qaçqın və məcburi köçkünlər məskunlaşan ərazilərinə baş çəkmək arzusunda olduqlarından söz açdı. Qonaq Azərbaycana ilk dəfə 2008-ci ildə ATƏT-in fəaliyyətdə olan sədri kimi səfər etdiyini və ötən bu müddət ərzində ölkəmizin sürətli iqtisadi inkişafından məmnun qaldığını bildirdi.
Sonra görüşdə qarşılıqlı maraq doğuran bir sıra məsələlər barədə fikir mübadiləsi aparıldı.
Görüşdə Milli Məclisin deputatı Elxan Süleymanov və digər rəsmi şəxslər iştirak edirdi.
Milli Məclisin
Mətbuat xidməti