MİLLİ MƏCLİSDƏ GÖRÜŞ
Noyabrın 23-də Milli Məclis Sədrinin müavini, Yeni Azərbaycan Partiyası İdarə Heyətinin üzvü Bahar Muradovanın Asiya siyasi partiyaları Beynəlxalq Konfransının VII Baş Assambleyasında iştirak etmək üçün ölkəmizdə səfərdə olan Rusiya Federasiyası Dövlət Dumasının deputatı, hakim Vahid Rusiya Partiyası İdarə Heyətinin üzvü Andrey Klimovla görüşü oldu.
Qonağı səmimi salamlayan Bahar Muradova xalqlarımız arasındakı dostluq münasibətlərinin tarixi köklərindən danışdı. Bildirdi ki, vaxtilə bir ölkədə yaşayıb fəaliyyət göstərmişik. Lakin, zaman dəyişib və artıq Rusiya ilə Azərbaycan iki ayrı-ayrı müstəqil dövlətdirlər. Vitse-spiker dövlətlərimiz arasında iqtisadi, siyasi, humanitar və diplomatik sahələrdə mövcud olan münasibətlərimizi yüksək dəyərləndirdi. Qeyd olundu ki, hərtərəfli əlaqələrimizin inkişafı üçün geniş zəmin yaradılmışdır. Bakıda keçirilən Asiya siyasi partiyaları Beynəlxalq Konfransının VII Baş Assambleyasının əhəmiyyətini vurğulayan Bahar Muradova dedi ki, hazırkı dövrdə ayrı-ayrı regionlarda mövcud olan problemlərin həll yollarının axtarılması üçün siyasi partiyaların sıx-sıx eyni müstəvidə toplaşması vacib məsələlərdəndir. Vitse-spiker onu da qeyd etdi ki, Vahid Rusiya Partiyasınn və YAP-ın hər iki ölkədə hakim partiya olması parlamentlərimiz arasında gələcək əməkdaşlıq üçün geniş perspektivlər açır.
Səmimi görüş üçün minnətdarlığını bildirən Andrey Klimov ölkələrimizin qanunvericilik orqanları arasında yüksək səviyyəli əməkdaşlıq qurulmasında qarşılıqlı səfərlərin əhəmiyyətini qeyd etdi. Qonaq Rusiya və Azərbaycan parlamentarilərinin beynəlxalq təşkilatlar çərçivəsində sıx əməkdaşlığından, qlobal problemlərin müzakirəsində vahid mövqedən çıxış etmələrindən söhbət açdı. Andrey Klimov Azərbaycanda rus dilinə olan yüksək münasibətdən məmnun olduğunu dilə gətirdi. Daha sonra qonaq dekabr ayında Vahid Rusiya Partiyası nümayəndələrinin YAP-la Sankt-Peterburq şəhərində görüş keçirmək təklifini irəli sürdü və təklifin məmnunluqla qarşılanacağına ümid etdiyini vurğuladı.
Görüşdə qarşılıqlı maraq doğuran bir sıra məsələlər barəsində fikir mübadiləsi aparıldı.
Milli Məclisin
Mətbuat xidməti