FRİDON TODUA: “Azərbaycan Gürcüstanın təkcə qonşusu deyil, yaxın dostudur...”
Yanvarın 17-də Milli Məclisin Beynəlxalq münasibətlər və parlamentlərarası əlaqələr komitəsinin üzvləri ölkəmizdə səfərdə olan Gürcüstan parlamentinin sədr müavini Fridon Toduanın başçılıq etdiyi nümayəndə heyəti ilə görüşdü.
Qonaqları salamlayan komitənin sədri Səməd Seyidov xalqlarımız arasındakı dostluq və qardaşlıq əlaqələrinin tarixi ənənələrə, qədim köklərə malik olduğunu bildirdi. Qeyd olundu ki, Azərbaycan və Gürcüstan təkcə qonşu və dost deyil, eyni zamanda strateji müttəfiqdirlər. Bu gün hər iki ölkə prezidentinin siyasəti nəticəsində bu əlaqələr daha da güclənir. Beynəlxalq təşkilatlarda hər iki xalqın eyni mövqedən çıxış etməsi yüksək səviyyəli strateji tərəfdaşlıq münasibətlərimizin bariz nümunəsidir. Səməd Seyidov hər iki xalqın ərazi bötüvlüyünün pozulmasından əziyyət çəkdiyini diqqətə çatdırdı. Qeyd edildi ki, Azərbaycanda 1 milyon, Gürcüstanda isə 500 mindən artıq qaçqın və məcburi köçkün var. Beynəlxalq ictimaiyyət bu insanların problemləri ilə az maraqlanır. Bu məsələdə bir-birimizə dəstək verməliyik.
Görüş üçün təşəkkürünü bildirən Fridon Todia xalqlarımızın sadəcə qonşu deyil, yaxın dost olduğunu diqqətə çatdırdı. Qonaq Gürcüstanın hər zaman Azərbaycanın dəstəyini hiss etdiyini xüsusi vurğuladı.
Görüşdə ölkələrimiz arasında mədəni və humanitar sferada, elm və təhsil sahəsində əlaqələrin inkişaf perspektivləri, Cənubi Qafqazdakı vəziyyət və digər məsələlər ətrafında fikir mübadiləsi aparıldı.
Milli Məclisin
Mətbuat xidməti