PARLAMENT XƏBƏRLƏRİ
Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov Xəzər Strateji İnstitutunun enerji məsələlərinə həsr olunmuş forumunda iştirak etmək üçün Türkiyənin İstanbul şəhərində səfərdədir.
Deputatımız tədbirdə müzakirə olunacaq məsələlərə öz münasibətini bildirəcək, fikirlərini açıqlayacaq.
Səfər dekabrın 6-da başa çatacaq.
* * *
Milli Məclisin deputatları Qənirə Paşayeva və Adil Əliyev “Dağlıq Qarabağ münaqişəsi və Cənubi Qafqaz regionunun təhlükəsizliyi” mövzusunda dekabrın 10-da keçiriləcək konfransda iştirak etmək üçün Niderland Krallığının Haaqa şəhərinə səfər edəcəklər.
Beynəlxalq İnsan Haqları gününə təsadüf edən tədbirin məqsədi Ermənistanın işğalı nəticəsində azərbaycanlıların etnik təmizləmə siyasətinə məruz qalması, işğal altındakı ərazilərdə xalqımıza məxsus tarixi və mədəni abidələrin dağıdılması, Dağlıq Qarabağ münaqişəsi barədə dünya ictimaiyyətinin daha ətraflı məlumatlandırılmasıdır.
* * *
Milli Məclisin deputatları Jalə Əliyeva və Qənirə Paşayeva Avropada Təhlükəsizlik və Əməkdaşlıq Təşkilatının Avropa Parlamenti ilə birgə təşkil etdiyi “ATƏT regionunda qadın deputatlar üçün parlament strukturlarının möhkəmləndirilməsi” mövzusunda dekabrın 12-də Avstriyanın paytaxtı Vyana şəhərində keçiriləcək konfransda iştirak edəcəklər.
Tədbirin əsas məqsədi quruma üzv dövlətlərin qadın deputatları arasında təcrübə mübadiləsini genişləndirməkdir. Deputatlarımız bu sahədə parlament strukturlarının təsisi və inkişafına dair fikir mübadiləsi aparacaqlar.
* * *
Milli Məclisin deputatı Çingiz Qənizadə TürkPA Beynəlxalq Əlaqələr Komissiyasının ikinci iclasında iştirak etmək üçün dekabrın 10-dan 13-dək Qazaxıstana səfər edəcək.
Astana şəhərində keçiriləcək tədbirdə “Türkdilli dövlətlər arasında münasibətlərin inkişafında Türk şurası, TürkPA və Türksoyun yeri və rolu” mövzusunda hesabat məruzəsi dinləniləcək, türk dünyasının qlobal siyasi arenada yeri haqqında fikir mübadiləsi aparılacaq.
Milli Məclisin
Mətbuat xidməti