ABŞ DÖVLƏT DEPARTAMENTİNİN NÜMAYƏNDƏLƏRİ MİLLİ MƏCLİSDƏ
Dekabrın 11-də Milli Məclis Sədrinin birinci müavini, Təhlükəsizlik və müdafiə komitəsinin sədri Ziyafət Əsgərov ölkəmizdə səfərdə olan Amerika Birləşmiş Ştatlarının dövlət katibinin demokratiya, insan haqları və əmək məsələləri üzrə müşaviri Tomas Melianın başçılıq etdiyi nümayəndə heyəti ilə görüşdü.
Qonaqları Azərbaycan parlamentində salamlamaqdan məmnunluq duyduğunu deyən Ziyafət Əsgərov onlara Milli Məclisdə qanun yaradıcılığı prosesi, Konstitusiyanın təsbit etdiyi vətəndaş hüquqları, seçki prosesi barədə ətraflı məlumat verdi. Ölkələrimiz arasında münasibətlərin yüksələn xəttlə inkişaf etdiyini söyləyən birinci vitse-spiker qeyd etdi ki, münasibətlərimiz artıq ən yaxın müttəfiqlik səviyyəsindədir. Azərbaycan Amerika Birləşmiş Ştatları ilə münasibətlərin daha da möhkəmlənməsində maraqlıdır. O, əlaqələrimizn inkişafında parlamentlərarası dostluq qruplarının fəaliyyətini də yüksək qiymətləndirdi. Azərbaycanın bir çox qlobal layihələrin təşəbbüskarı və iştirakçısı olduğunu bildirən Ziyafət Əsgərov qeyd etdi ki, ölkəmiz Avropanın karbohidrogen ehtiyatları ilə təmin olunmasında əhəmiyyətli yer tutur. Qonaqlara Dağlıq Qarabağ münaqişəsi barədə məlumat verən parlament sədrinin birinci müavini vurğuladı ki, Ermənistanın işğalçılıq siyasətindən və törətdiyi terror hadisələrindən əziyyət çəkən ölkəmiz beynəlxalq terrorizmə qarşı mübarizədə ilk gündən ABŞ-ın yanında olub.
Səmimi görüş üçün minnətdarlıq edən Tomas Melia bildirdi ki, bugünkü görüşün məqsədi ölkənin ali qanunvericilik hakimiyyətinin fəaliyyəti ilə əlaqədar parlament rəhbərliyinin fikirlərini dinləməkdir. Qonaq Azərbaycanın Kosovo, Əfqanıstan və İraqda NATO qüvvələri tərkibində sülhyaratma əməliyyatlarına və beynəlxalq terrorizmə qarşı mübarizəyə verdiyi dəstəyə görə ölkəmizə təşəkkürünü bildirdi. Qeyd olundu ki, ABŞ demokratiya yolunda inamlı addımlar atan Azərbaycanla çox yaxşı münasibətlər qurub və bu əməkdaşlığın daha da dərinləşməsində maraqlıdır.
Söhbətdə tərəfləri maraqlandıran bir sıra məsələlər ətrafında fikir mübadiləsi aparıldı.
Görüşdə Milli Məclisin komitə sədrləri Əli Hüseynli, Hadi Rəcəbli, Rəbiyyət Aslanova və digər rəsmi şəxslər iştirak edirdilər.
Milli Məclisin
Mətbuat xidməti