SOSİAL SİYASƏT KOMİTƏSİNİN İCLASINDA
Dekabrın 13-də Milli Məclisin Sosial siyasət komitəsinin iclası keçirildi. Komitə sədri Hadi Rəcəbli gündəlikdə duran məsələlərlə iclas iştirakçılarını tanış etdi. Bildirildi ki, bu gün İnzibati Xətalar və Əmək məcəllələrinə dəyişikliklər edilməsi barədə qanun layihələri müzakirə olunur. Komitə sədri qeyd etdi ki, “Həmkarlar İttifaqı haqqında” qanun layihəsinə edilən dəyişikliklər Əmək Məcəlləsinə uyğunlaşdırılacaq. Dəyişikliklər mülkiyyət formasından asılı olmayaraq işəgötürən tərəfin həmkarlar ittifaqının üzvü olan işçilərin əmək haqqından mühasibatlıq vasitəsi ilə ittifaqa üzvlük haqlarının tutulmasının təmin edilməsini və 4 iş günü müddətində həmkarlar ittifaqının hesabına köçürülməsini tələb edir. Köçürməni gecikdirənlər üçün 2 ilədək inzibati tənbeh cəzası nəzərdə tutulacaq.
Hadi Rəcəbli iclasda onu da vurğuladı ki, bu dəyişiklik həmkarlar ittifaqlarının formalaşmasına və inkişafına öz töhfəsini verəcək. Belə ki, vaxtında baş tutan köçürmələr hesabına həmkarlar ittifaqı daha çox üzvlərini kurort və sanatoriyalara müalicə və istirahət üçün göndərmək, onlara yardım etmək imkanı əldə edəcək. Daha sonra komitə üzvləri İnzibati Xətalar Məcəlləsində redaktə xarakterli dəyişikliklər etdilər.
Sonda hər iki sənədin Milli Məclisin plenar sessiyasının müzakirəsinə çıxarılması məqsədəuyğun hesab edildi.
Milli Məclisin
Mətbuat xidməti