AZƏRBAYCAN – ÇİN ƏLAQƏLƏRİ GÜNBƏGÜN MÖHKƏMLƏNİR
Dekabrın 17-də Milli Məclisin Azərbaycan – Çin parlamentlərarası əlaqələr üzrə işçi qrupu üzvlərinin ölkəmizdə səfərdə olan Çin Xalq Siyasi Konsultativ Şurası Ümumçin Komitəsinin sədr müavini Bay Liçenin başçılıq etdiyi nümayəndə heyəti ilə görüşü oldu.
Qonaqları salamlayan qrupun rəhbəri, YAP-ın İcra katibi Əli Əhmədov xalqlarımız arasında tarixən mövcud olan qardaşlıq əlaqələrindən söhbət açdı. Bildirildi ki, iki dost ölkə arasında münasibətlər gündən-günə inkişaf edir. Parlamentlər arasındakı sıx əlaqələr bu münasibətlərin inkişafına müsbət təsir göstərir. Əli Əhmədov Azərbaycanda Çinin sürətli inkişafının diqqətlə izlənildiyini və qarşılıqlı səfərlərin bu sahədə böyük önəm daşıdığını dilə gətirdi. O, hər iki xalqın bir-birinin ərazi bütövlüyünü dəstəkləməsindən, siyasi sahədə sıx əlaqələr qurmağın əhəmiyyətindən və Çin Kommunist Partiyası ilə Yeni Azərbaycan Partiyası arasındakı əlaqələrdən söz açdı. Daha sonra Əli Əhmədov qeyd etdi ki, Azərbaycan iqtisadiyyatı xarici sərmayələr üçün açıqdır və bu da imkan verir ki, çinli sahibkarlar buraya sərmayə yatırsın. Ölkələrimiz qarşılıqlı əməkdaşlıq nəticəsində ticarət dövriyyəsinin həcmini artıra bilərlər.
Səmimi görüş və yüksək qonaqpərvərlik üçün minnətdarlığını bildirən Bay Liçen iki ölkənin parlamentləri arasındakı dostluq əlaqələrinin nəzərə çarpacaq dərəcədə inkişaf etdiyini qeyd etdi. Qonaq dedi: “Beynəlxalq arenada əməkdaşlığımız və bir-birimizə dəstək verməyimiz regionda sabitliyin və sülhün bərqərar olmasında mühüm əhəmiyyət kəsb edir”. O, vurğuladı ki, Azərbaycan və Çin hazırda yüksək inkişaf tempi nümayiş etdirən ölkələrdir və iqtisadi ələqələrin inkişafı üçün yaxşı potensial var. Əməkdaşlığımız xalqlarımızın rifahına xidmət edir. Bay Liçen bildirdi ki, Çin Kommunist Partiyasının 18-ci qurultayından sonra Azərbaycanla münasibətlərin daha da inkişaf etdirilməsi qarşıya məqsəd kimi qoyulub.
Görüşdə qarşılıqlı maraq doğuran bir sıra məsələlər barədə fikir mübadiləsi aparıldı.
Milli Məclisin
Mətbuat xidməti