AVROPA ŞURASI VENESİYA KOMİSSİYASININ ÜZVLƏRİ PARLAMENTDƏ OLDU
Aprelin 11-də Milli Məclisin Hüquq siyasəti və dövlət quruculuğu komitəsinin sədri Əli Hüseynli və İnsan hüquqları komitəsinin sədri Rəbiyyət Aslanovanın ölkəmizdə səfərdə olan Avropa Şurası Venesiya Komissiyasının üzvləri ilə görüşü keçirildi.
Qonaqları salamlayan Əli Hüseynli Azərbaycan parlamenti ilə Venesiya Komissiyası arasındakı sıx əməkdaşlıqdan danışdı. Bildirildi ki, ölkəmiz Avropa Şurası qarşısında götürdüyü öhdəlikləri layiqincə yerinə yetirir. Komitə sədri parlamentdə qanun yaradıcılığı prosesi, qanunların hazırlanma texnologiyası, milli qanunvericiliyin Avropa standartlarına uyğunlaşdırılması sahəsində görülən işlərdən, əldə olunan nailiyyətlərdən söhbət açdı.
İnsan hüquqları komitəsinin sədri Rəbiyyət Aslanova Venesiya Komissiyası ilə Milli Məclis arasında mövcud olan ənənəvi dostluq münasibətlərini yüksək qiymətləndirdiyini vurğuladı. Qeyd olundu ki, Azərbaycan qanunvericilik sistemində beynəlxalq hüququn normalarına hörmətlə yanaşılır, Venesiya Komissiyasının qanun yaradıcılığı sahəsində məsləhət və tövsiyələrinə xüsusi diqqət göstərilir. Bildirildi ki, ölkəmizdə insan hüquqlarının daha da möhkəmləndirilməsi istiqamətində bütün zəruri addımlar atılır.
Avropa Şurası Venesiya Komissiyasının üzvü Herdis Torgeirsdottir səmimi görüş üçün təşəkkürünü bildirdi, Bakıda səmərəli görüşlər keçirdiklərini dedi.
Görüşdə qarşılıqlı maraq doğuran bir sıra məsələlər barəsində fikir mübadiləsi aparıldı.
Milli Məclisin
Mətbuat xidməti