TÜRKİYƏ - AZƏRBAYCAN MÜNASİBƏTLƏRİ BÜTÜN TÜRK DÜNYASININ MİLLİ-MƏNƏVİ BİRLİYİNİN GÖSTƏRİCİSİDİR
Yanvarın 19-da Milli Məclisin Azərbaycan-Türkiyə parlamentlərarası əlaqələr üzrə işçi qrupunun üzvləri Türkiyə Böyük Millət Məclisinin Türkiyə-Azərbaycan parlamentlərarası dostluq qrupunun ölkəmizdə səfərdə olan nümayəndələri ilə görüşmüşlər.
Qonaqları salamlayan Milli Məclisin Mədəniyyət komitəsinin sədri, işçi qrupun rəhbəri Nizami Cəfərov bildirdi ki, bu gün Türkiyə və Azərbaycan arasındakı əlaqələr bütün türk dünyasının milli-mənəvi və mədəni birliyinin əzmkarlığını nümayiş etdirir. Qeyd olundu ki, hər iki tərəfdə siyasi, iqtisadi və humanitar sahələrdə əməkdaşlığın daha da genişləndirilməsi, təcrübə mübadiləsinin aparılması üçün dostluğa və qardaşlığa söykənən yüksək potensial var. Komitə sədri Azərbaycan və Türkiyə parlamentarilərinin mütəmadi görüşlərinin vacibliyindən danışdı, bu səfərin də faydalı olacağına inamını bildirdi.
Səmimi görüş və qonaqpərvərlik üçün minnətdarlıq edən Türkiyə Böyük Millət Məclisinin Azərbaycanla parlamentlərarası əlaqələr üzrə işçi qrupunun rəhbəri Necdət Ünüvar yeni tərkibdə işçi qrupunun Azərbaycana ilk dəfə səfər etdiyini söylədi. Bakıda olduqları iki gün müddətində çox vacib görüşlər keçirdiklərindən, faydalı müzakirələr apardıqlarından danışdı. Qonaq Fransa Milli Assambleyasında qondarma “erməni soyqırımı”nı inkar edənlərə qarşı cəza tədbirləri nəzərdə tutulmuş qanunun Senatda müzakirəyə çıxarılmasına qarşı Azərbaycanın atdığı addımları yüksək qiymətləndirdi.
İşçi qrupun üzvləri Eldar İbrahimov, Əhliman Əmiraslanov, Əhməd Vəliyev, Qənirə Paşayeva ölkələrimiz arasında mövcud olan iş birliyini xüsusi qeyd etdilər, münasibətlərimizi yüksək dəyərləndirdilər.
Görüşdə Türkiyənin Azərbaycandakı səfiri Hülusi Kılıc iştirak edirdi.
Milli Məclisin
Mətbuat xidməti