AQRAR SİYASƏT KOMİTƏSİNİN İCLASINDA
Aprelin 19-da Milli Məclisin Aqrar siyasət komitəsinin iclası keçirildi. İclası açan komitə sədri Eldar İbrahimov müzakirəyə “Torpaq Məcəlləsinə dəyişiklik edilməsi barədə” qanun layihəsinin daxil edildiyini vurğuladı.
Milli Məclis Aparatının İqtisadi qanunvericilik şöbəsinin müdir müavini, aqrar qanunvericilik sektorunun müdiri Şahmərdan Kərimov dəyişikliyi ətraflı şərh etdi. Bildirildi ki, bu əlavə Mülki Məcəllənin “Daşınar və daşınmaz əmlaka hüquqların dövlət qeydiyyatı” adlanan 139-cu maddəsinin 4-cü bəndinə edilir. “Məkana görə daşınmaz əmlak obyektlərinin xüsusi vasitələrdən istifadə edilmədən yerləşdiyi yerin müəyyənləşdirilməsini və fərqləndirilməsini təmin edən məlumat bazası olan ünvan reyestri aparılır.” Belə ki, yeni dəyişikliyə əsasən, çoxmənzilli binaların, fərdi yaşayış yerlərinin, qeyri-yaşayış sahələrinin və onların tərkib hissələrinin girişlərinə ünvan verilir. Hər bir girişə nəqliyyat infrastrukturu obyektlərinin başlanğıcından sağdakılara cüt, soldakılara tək olmaqla ünvan nömrəsi veriləcək. Nəqliyyat infrastrukturu obyektlərinə çıxışı olan torpaq sahələri və onların üzərindəki qurğular da ünvan alacaq məkanlar sırasına daxildir.
Komitə üzvləri Eldar Quliyev, Novruzəli Aslanov, Mahir Aslanov və başqaları sənədə edilən dəyişikliyi razılıqla qarşıladılar, bunu vaxtında düşünülmüş addım kimi dəyərləndirdilər. Məhz bu ünvansızlıq səbəbindən vətəndaşların bir sıra problemlər yaşadığı, yeni dəyişikliyin bu uyğunsuzluğun qarşısını ala biləcəyi vurğulandı.
Sonda komitə üzvləri layihənin Milli Məclisin plenar iclasına tövsiyə olunmasını məqsədəuyğun hesab etdilər.
Milli Məclisin
Mətbuat xidməti