NATO PA-dakı Azərbaycan parlamenti nümayəndə heyətinin üzvləri Məlahət İbrahimqızı və Qüdrət Həsənquliyev qurumun təşkilatçılığı ilə keçirilən “Cənubi Qafqaz: geosiyasət, Avratlantika strukturlarına inteqrasiya və daxili çağırışlar” mövzusunda seminarda iştirak etmək üçün  aprelin 28-dən Gürcüstanın paytaxtı Tbilisidə səfərdədirlər.
NATO PA-nın 83-cü Rouz-Rout seminarı adlandırılan həmin tədbirdə Cənubi Qafqaz və Avratlantika strukturlarına inteqrasiya, Gürcüstan-Rusiya münasibətləri, Gürcüstanda planlaşdırılmış islahatlar proqramı, bölgənin aktual məsələləri müzakirə olunur. Fikir mübadiləsi aparılır. Tədbirdə NATO PA-nın üzvü olan ölkələrin, həmçinin assosiativ üzv statusu daşıyan dövlətlərin nümayəndə heyətləri, beynəlxalq və yerli ekspertlər, Gürcüstanda akkreditə olunmuş diplomatik korpusun, QHT-lərin nümayəndələri iştirak edirlər.
Azərbaycan nümayəndə heyətinin üzvləri seminarda fəallıq göstərirlər. Məlahət İbrahimqızı tədbirdə “Avratlantika strukturlarına Azərbaycanın rəsmi münasibəti” mövzusunda təqdimat keçirib.
Səfər mayın 1-də başa çatacaq.

                                               Milli Məclisin
Mətbuat xidməti