SOSİAL SİYASƏT KOMİTƏSİNDƏ GÖRÜŞ
Mayın 6-da Milli Məclisin Sosial siyasət komitəsinin sədri Hadi Rəcəbli ölkəmizdə səfərdə olan AŞPA-nın Bərabərlik və qeyri-diskriminasiya komitəsi sədrinin birinci müavini cənab Mendes Bota ilə görüşdü.
Komitə sədri qonağa rəhbərlik etdiyi komitənin fəaliyyəti, qanunvericilik prosesində beynəlxalq əməkdaşlığın gücləndirilməsi, ölkə əhalisinin sosial müdafiəsinin günü-gündən yaxşılaşdırılması, hüquqi bazanın Avropa dəyərlərinə uyğunlaşdırılması barədə ətraflı məlumat verdi. Hadi Rəcəbli parlamentdə “Məişət zorakılığı haqqında” qanunun hazırlanması prosesindən, bu sahədə maarifləndirmə işinin təşkilindən söhbət açdı. Bildirildi ki, sənədin qəbulundan sonra məişət zorakılığından əziyyət çəkən qadınların reabilitasiyası, zorakılığın qarşısının alınması, sosial evlərin qurulması, qaçqın və məcburi köçkün qadınların problemlərinin həlli, gənclərin nikaha hazırlanması, uşaqların sosial müdafiəsi ilə bağlı böyük işlər görülüb. O, komitədə hazırlanan qanun layihələri barədə qonağa məlumat verdi.
Mendes Bota ölkəmiz üçün belə əlamətdar bir dövrdə - xalqımızın ümummilli lideri Heydər Əliyevin doğum günü ərəfəsində ölkəmizdə olmasından qürur duyduğunu ifadə etdi. Azərbaycana üçüncü dəfə gəldiyini bildirən qonaq hər gəlişində ölkədə böyük irəliləyiş müşahidə etdiyini, şəhərimizin son dərəcə gözəlləşdiyini qeyd etdi. O, Azərbaycana AŞPA-nın qadınlara qarşı zorakılığın aradan qaldırılması üzrə nümayəndəsi qismində gəldiyini bildirdi, bu sahədə təmsil etdiyi qurumda görülən işlər və ümumavropa təcrübəsi barədə danışdı. Mendes Bota 2006-cı ildə Azərbaycana səfəri çərçivəsində Milli Məclisdə “Məişət zorakılığı haqqında” qanunun layihə variantının hazırlanması prosesində iştirak etdiyini qeyd etdi. Qanunun belə qısa bir vaxtda ölkədə işlək vəziyyətə gəlməsindən məmnun olduğunu vurğuladı.
Görüşdə qarşılıqlı maraq doğuran bir sıra məsələlərə də toxunuldu.
Milli Məclisin
Mətbuat xidməti