LUİS ALBERTO LASAYE: “Azərbaycanda dini tolerantlıq səviyyəsi çox yüksəkdir”
Mayın 8-də Milli Məclisin Azərbaycan – Uruqvay parlamentlərarası əlaqələr üzrə işçi qrupu üzvlərinin ölkəmizdə səfərdə olan Uruqvay Respublikasının sabiq prezidenti, parlamentin senatoru ilə görüşü keçirildi.
Qonağı salamlayan Milli Məclisin Beynəlxalq münasibətlər və parlamentlərarası əlaqələr komitəsinin üzvü, işçi qrupun rəhbəri Cavanşir Feyziyev Azərbaycanın təşəbbüskarı və fəal iştirakçısı olduğu qlobal layihələrdən, ölkəmizin iqtisadi gücünə görə regionda lider dövlət olduğundan söz açdı. Millət vəkili parlamentdə qəbul edilən qanunvericilik aktları, ölkəmizdə hüquqi və demokratik dövlət quruculuğu, azad vətəndaş cəmiyyəti, insan hüquqlarının qorunması barədə ətraflı danışdı.
Elm və təhsil komitəsinin sədr müavini, işçi qrupun üzvü Bəxtiyar Əliyev bildirdi ki, bu səfər ölkəmiz üçün çox ağrılı bir günə təsadüf edir. 8 may Azərbaycanın mədəniyyət beşiyi olan qədim Şuşanın işğalı günüdür. Ermənistan – Azərbaycan Dağlıq Qarabağ münaqişəsindən söz açan deputat qeyd etdi ki, 20 ildən artıqdır ki, Azərbaycan müharibə şəraitində yaşayır. Təəssüf ki, hələ də münaqişənin beynəlxalq hüquq normaları çərçivəsində, sülh yolu ilə həllinə nail olunması istiqamətində göstərilən səylər nəticəsiz qalıb.
Deputat, işçi qrupun digər üzvü Aslan Cəfərov dostluq qruplarının qarşılıqlı səfərlərinin ölkələrimiz arasında əməkdaşlığın genişləndirilməsində rolu barədə fikirlərini ifadə etdi.
Səmimi münasibətə və ətraflı məlumata görə təşəkkürünü bildirən Luis Alberto Lasaye hər iki ölkənin sülhsevər siyasət yürütdüklərini bəyan etdi. Bakıya Nizami Gəncəvi Beynəlxalq Mərkəzi və Madrid Klubunun birgə təşkilatçılığı ilə keçirilən birinci Cənubi Qafqaz Forumunda iştirak etmək üçün gəldiyini deyən qonaq xalqlarımız arasında mədəniyyət, dinlərarası münasibət və geosiyasi baxımdan çoxlu oxşarlıqlar olduğunu dedi. O, Azərbaycanda müşahidə etdiyi dini tolerantlıq səviyyəsindən məmnun qaldığını diqqətə çatdırdı. Bildirildi ki, ölkələrimiz arasında iqtisadi, mədəni, humanitar sahədə geniş əməkdaşlıq imkanları mövcuddur.
Görüşdə sonra qarşılıqlı maraq doğuran digər məsələlər müzakirə edildi.
Milli Məclisin
Mətbuat xidməti