TƏHLÜKƏSİZLİK VƏ MÜDAFİƏ KOMİTƏSİNİN İCLASINDA
Mayın 13-də Milli Məclisin Təhlükəsizlik və müdafiə komitəsinin növbəti islası keçirildi. İclasda “Azərbaycan Respublikası Müdafiə Nazirliyi və Beynəlxalq Hərbi İdman Şurası arasında Beynəlxalq Hərbi İdman Şurasının Birinci Dünya Futbol Kubokunun təşkili haqqında Müqavilənin təsdiq olunması barədə” qanun layihəsi müzakirə olundu.
Milli Məclis Sədrinin birinci müavini, komitə sədri Ziyafət Əsgərov bildirdi ki, 2013-cü ilin fevralın 27-də Bakıda imzalanmış bu müqavilədə tərəflərin öhdəlikləri, yarışların təşkili, keçirilməsi, yayımı və digər məsələlər əksini tapıb. FİFA, Azərbaycan Milli Olimpiya Komitəsi, Gənclər və İdman Nazirliyi, AFFA-nın tərəfdaş olduğu bu yarışlarda 16 komanda iştirak edəcək. İyun ayının 30-dan iyulun 16-dək Bakıda keçirilməsi nəzərdə tutulan futbol turnirində Afrika qitəsinə 4, Amerikaya 3, Asiyaya 4, Avropaya 3 yer ayrılıb. Həmçinin, Azərbaycan yarışa ev sahibi, Əlcəzair isə titulun sahibi kimi qatılacaq. Birinci vitse-spiker onu da vurğuladı ki, belə bir tədbirə ev sahibliyi etmək son zamanlar müxtəlif sahələrdə uğurlar qazanan Azərbaycana olan böyük hörmət və etimadın ifadəsidir. Qeyd olundu ki, bu vaxtadək dəfələrlə ölkəmizdə mülki idmançıların yarışdığı müxtəlif beynəlxalq turnirlər keçirilib, hərbi sahədə çalışanların idman bayramının təşkili isə ilk dəfədir. Tədbir hərbiçilərin fiziki sağlamlıqlarının qorunmasına da bir töhfə olacaq.
Milli Məclisin deputatları Aydın Mirzəzadə, Adil Əliyev, Fərəc Quliyev və başqaları çıxış edərək sənədin əhəmiyyəti barədə danışdılar, təkliflərini bildirdilər.
Müzakirələrdən sonra qanun layihəsinin Milli Məclisin plenar iclasına çıxarılması tövsiyə olundu.
Milli Məclisin
Mətbuat xidməti