MİLLİ MƏCLİSDƏ GÖRÜŞLƏR
Mayın 16-da Milli Məclisin Azərbaycan-Küveyt parlamentlərarası əlaqələr üzrə işçi qrupu üzvlərinin Küveyt parlamentində Azərbaycanla dostluq qrupunun rəhbəri Mübarək Saleh əl-Nəcədə ilə görüşü keçirildi.
Qonağı salamlayan deputat, işçi qrupun rəhbəri Hüseynbala Mirələmov ölkələrimiz arasında çox mehriban münasibətlərin mövcud olduğunu bildirdi. Qeyd olundu ki, iki ölkə arasında əlaqələr daim inkişaf edir, siyasi, iqtisadi, mədəni və humanitar sahələrdə əməkdaşlığın genişləndirilməsi, təcrübə mübadiləsinin aparılması üçün yaxşı potensial vardır.
Aqrar siyasət komitəsinin sədri, işçi qrupun üzvü Eldar İbrahimov qonağa Ermənistan-Azərbaycan Dağlıq Qarabağ münaqişəsinin mövcud durumu barədə məlumat verdi. Komitə sədri qeyd etdi ki, hələ də dünyada Ermənistanın işğalçılıq siyasəti yürütdüyünü bilərək bu münaqişəyə ikili standartlarla yanaşılır.
Görüşdə parlamentlərarası əlaqələrin inkişaf perspektivləri, qarşılıqlı əməkdaşlığın inkişafında dostluq qruplarının rolu, qarşılıqlı təcrübə mübadiləsi və digər mövzularda müzakirələr aparıldı.
* * *
Mayın 16-da Milli Məclisin İnsan hüquqları komitəsinin sədri Rəbiyyət Aslanova ölkəmizdə səfərdə olan Küveyt dövləti Milli Məclisinin Küveyt-Azərbaycan dostluq qrupunun rəhbəri Mübarək Saleh Əl-Nəcədə ilə görüşdü.
Rəbiyyət Aslanova bu gün Azərbaycanın inkişaf etmiş ölkələr sırasına çıxmasında ümummilli lider Heydər Əliyevin böyük rolundan və zəhmətindən danışdı. Azərbaycan və Küveytin İslam dini vasitəsilə bir-birinə dərin köklərlə bağlı olduğunu deyən Rəbiyyət Aslanova Dağlıq Qarabağ münaqişəsinin həlli prosesində ölkəmizə verdiyi dəstəyə görə Küveyt rəhbərliyinə təşəkkürünü bildirdi. Qeyd etdi ki, bu münaqişənin həlli barədə bir sıra beynəlxalq təşkilatlarda dəfələrlə müzakirələr aparılıb və biz münaqişənin beynəlxalq hüquq prinsipləri əsasında həll olunacağına inanırıq.
Görüşdə qonağa Dağlıq Qarabağ münaqişəsi, Xocalı soyqırımı, ölkəmizdə insan hüquqlarının qorunması sahəsində görülən işlər, həyata keçirilən dövlət proqramları barədə məlumat verildi. Söhbət zamanı Azərbaycan cəmiyyətində qadının rolu və yeri, elm və təhsil sahəsində əməkdaşlıq, qarşılıqlı münasibətlərin inkişafı üçün səfərlərin vacibliyi barədə fikir mübadiləsi aparıldı.
Görüşlərdə Azərbaycanın Küveytdəki fövqəladə və səlahiyyətli səfiri Tural Rzayev iştirak edirdi.
Milli Məclisin
Mətbuat xidməti