AŞPA PREZİDENTİ DEPUTATLARLA GÖRÜŞDÜ
Mayın 27-də Milli Məclisdə təmsil olunan siyasi partiyaların nümayəndələrinin ölkəmizdə səfərdə olan AŞPA Prezidenti Jan-Klod Minyonla görüşü oldu.
Qonaqları salamlayan deputat, YAP-ın icra katibinin müavini Mübariz Qurbanlı bildirdi ki, Milli Məclisin tərkibi Azərbaycanın siyası palitrasını özündə tam şəkildə əks etdirir. Parlamentdə 10-a yaxın siyasi partiya təmsil olunur. O, qonağa parlamentin qanun yaradıcılığı prosesi, ölkədə insan hüquqlarının təminatı, digər ölkə və parlamentlərlə qarşılıqlı əməkdaşlığın perspektivləri barədə məlumat verdi. Azərbaycanın Avropa Şurası qarşısında götürdüyü öhdəlikləri layiqincə yerinə yetirməsindən, qurumla əlaqələrin daha da inkişaf etməsinə tərəfdar olduğumuzdan söz açdı.
Görüşdə çıxış edən Demokratik İslahatlar Partiyasının sədri Asim Mollazadə bildirdi ki, qonağın ölkəmizə səfəri olduqca əlamətdar bir dövrə təsadüf edir. Sabah xalqımız Azərbaycan Xalq Cümhuriyyətinin 95 illik yubileyini təntənə ilə qeyd edəcək. Ana Vətən Partiyasının sədri Fəzail Ağamalı çıxışında Azərbaycan parlamentinin qəbul etdiyi qanunların beynəlxalq standartlara uyğunlaşdırıldığını vurğuladı. Bildirildi ki, Venesiya Komissiyası və Avropa Şurasının digər təsisatları ilə qarşılıqlı əməkdaşlığımız yüksək səviyyədədir. Parlamentdə qanun layihələri hazırlanarkən bu qurumlardan gələn bütün təkliflərə həssaslıqla yanaşılır.
Vətəndaş Həmrəyliyi Partiyasının sədri Sabir Rüstəmxanlı, Ədalət Partiyasının sədri İlyas İsmayılov, Sosial rifah Partiyasının sədri Xanhüseyn Kazımlı, Böyük Quruluş Partiyasının sədri Fazil Mustafa, Ümid Partiyasının sədri İqbal Ağazadə çıxışlarında Azərbaycanın ən ağrılı problemi olan Ermənistan-Azərbaycan Dağlıq Qarabağ problemindən söhbət açdılar. Qeyd olundu ki, 20 ildən artıqdır ki, davam edən münaqişə bütün regionun təhlükəsizliyini ciddi təhdid altında saxlayır.
Jan-Klod Minyon səmimi görüşə görə minnətdarlığını ifadə etdi. O, Azərbaycanda müşahidə olunan dinamik inkişafı yüksək qiymətləndirdi. Qonaq ölkəmizdə çoxlu görüşlər keçirdiyini, son dövrdəki siyasi-iqtisadi vəziyyətə dair səmərəli fikir mübadiləsi apardığını qeyd etdi. Dağlıq Qarabağ probleminin həllinin vacibliyindən danışan qonaq bildirdi ki, münaqişənin həllində beynəlxalq hüququn norma və prinsiplərinə istinad edilməlidir.
Söhbətdə Ermənistan-Azərbaycan, Dağlıq Qarabağ münaqişəsinin həlli yolları, regionda və dünyada sülhün bərqərar olması üçün atılan addımlar, bu istiqamətdə səylərin gücləndirilməsi və qarşılıqlı maraq doğuran digər məsələlər ətrafında fikir mübadiləsi aparıldı.
Milli Məclisin
Mətbuat xidməti