MİLLİ MƏCLİSİN İCLASINDA
Oktyabrın 22-də Milli Məclisin növbəti iclası keçirildi. İclası açan Milli Məclisin Sədri Oqtay Əsədov İlham Heydər oğlu Əliyevi 9 oktyabr - Prezident seçkilərində qazandığı parlaq qələbə münasibəti ilə Milli Məclis üzvləri adından təbrik etdi. Spiker bildirdi: “Bu yaxınlarda ölkəmizin və dövlətimizin siyasi həyatında böyük bir hadisə baş verdi. Prezident seçkilərində Azərbaycan xalqı İlham Əliyevə səs verməklə özünün gələcək inkişafına səs verdi. Bu münasibətlə mən sizin hamınızı ürəkdən təbrik edirəm. Böyük fəxarət hissi duyuram ki, Prezident andiçmə mərasimini Mili Məclisdə keçirdi. Belə önəmli bir mərasimin parlamentdə keçirilməsi dövlət başçısının ölkənin qanunverici orqanına verdiyi yüksək qiymətdən xəbər verir. İlham Əliyevə qarşıdakı 5 illik prezidentlik fəaliyyətində uğurlar, Azərbaycanın xoş sabahı naminə böyük nailiyyətlər arzulayıram!” Oqtay Əsədov ölkə başçısına parlament adından təbrik məktubu ünvanlanacağını qeyd etdi.
Sonra spiker bildirdi ki, ölkə Konstitusiyasının 109-cu maddəsinin 4-cü bəndinə uyğun olaraq Prezident İlham Əliyev Azərbaycan Respublikasının Baş naziri vəzifəsinə təyin olunmasına razılıq verilməsi üçün Artur Tahir oğlu Rasizadənin namizədliyi ilə əlaqədar Milli Məclisə müraciət etmişdir. Prezidentin bu təqdimatını yüksək dəyərləndirən Milli Məclisin Sədri qeyd etdi ki, Artur Rasizadə olduqca təcrübəli və layiqli insandır. Bu məsələ səsə qoyuldu və Prezidentin təqdimatına razılıq verildi. Artur Rasizadəni təbrik edən Oqtay Əsədov ona fəaliyyətində uğurlar arzuladı.
Gündəlikdəki ilk iki məsələ - Bakı Appelyasiya Məhkəməsi hakiminin təyin edilməsi və Bakı, Gəncə və Şirvan şəhər Apellyasiya məhkəmələri hakimlərinin tutduqları vəzifələrindən azad olunması ilə bağlı Azərbaycan Prezidentinin təqdimatına baxıldı. Hər iki layihə barədə məlumat verən Hüquq siyasəti və dövlət quruculuğu komitəsinin sədri Əli Hüseynli bildirdi ki, “Məhkəmələr və hakimlər haqqında” qanunun 97-ci maddəsinə əsasən sənəd parlamentə təqdim edilib. Təqdimata əsasən, Bakı Apellyasiya Məhkəməsinin səlahiyyət müddəti bitmiş hakimi Qail Fazil oğlu Məmmədov yenidən hakim vəzifəsinə təyin edilir, Bakı Apellyasiya Məhkəməsinin hakimi Xəlilov Hilal İsmayıl oğlu, Gəncə Apellyasiya Məhkəməsinin hakimi Əhmədov Ceyhun Rasim oğlu və Şirvan Apellyasiya Məhkəməsinin hakimi Allahverdiyev Məhərrəm Ələkbər oğlu tutduqları vəzifələrindən azad edilirlər. Təqdimat səsə qoyularaq qəbul olundu.
Türkdilli Dövlətlərin Əməkdaşlıq Şurasının üçüncü Zirvə toplantısı Bəyannaməsinin təsdiq edilməsi haqqında sənədlə bağlı Beynəlxalq münasibətlər və parlamentlərarası əlaqələr komitəsinin sədri Səməd Seyidov məlumat verdi. Komitə sədri bu yaxınlarda Qəbələ rayonunda keçirilən toplantının əhəmiyyəti barədə danışdı, bunu türkdilli xalqların bir-birinə yaxınlaşması və dünya arenasında öz yerini möhkəmlətməsində önəmli hadisə kimi qiymətləndirdi. Deputat Fəttah Heydərov da türkdilli dövlətlərin zirvə toplantısının Qəbələdə keçirilməsini, burada mühüm sənədlərin qəbul olunmasını əhəmiyyətli hal adlandırdı. Sənəd ətraflı müzakirələrdən sonra səsə qoyularaq qəbul edildi.
“Azərbaycan və Gürcüstan Hökumətləri arasında fövqəladə halların nəticələrinin aradan qaldırılması, məhdudlaşdırılması və azaldılması sahəsində əməkdaşlıq haqqında” Sazişin təsdiq edilməsi, “Azərbaycan Hökuməti və Avropa İnvestisiya Bankı arasında AİB-in Azərbaycan Respublikasındakı fəaliyyətini tənzimləyən Çərçivə Sazişi”nin təsdiq edilməsi haqqında qanun layihələri barədə Milli Məclis Sədrinin birinci müavini, Təhlükəsizlik və müdafiə komitəsinin sədri Ziyafət Əsgərov məlumat verdi. Hər iki sənəd səsə qoyularaq qəbul edildi.
İclasda Vergi Məcəlləsinə edilən redaktə xarakterli dəyişiklik barədə İqtisadi siyasət komitəsinin sədri Ziyad Səmədzadə məlumat verdi. Sənəd səsvermə yolu ilə təsdiq edildi.
Sonra “Dövlət rüsumu haqqında” qanuna dəyişiklik müzakirəyə çıxarıldı. Layihə barədə məlumat verən İqtisadi siyasət komitəsinin sədri Ziyad Səmədzadə bildirdi ki, sənəddəki dəyişikliyə əsasən şəxsiyyət vəsiqəsinin və ümumvətəndaş pasportlarının verilməsinə və ya dəyişdirilməsinə görə ödənilən dövlət rüsumunun 20 faizi müvafiq icra hakimiyyəti orqanının pasport və qeydiyyat qurumlarının xüsusi rütbəsi olan əməkdaşlarının ("ASAN xidmət" mərkəzlərində fəaliyyət göstərən işçilər istisna olmaqla) sosial müdafiəsini gücləndirmək və maddi təminatını yaxşılaşdırmaq məqsədilə xüsusi hesaba köçürüləcək. Layihə səsə qoyularaq qəbul olundu.
İclasda Mülki Məcəlləyə texniki xarakterli dəyişikliyə də baxıldı.
Gündəlikdəki növbəti məsələ "Bədən tərbiyəsi və idman haqqında" qanunda dəyişikliklər edilməsi barədə sənəd haqqında məlumat verən Sosial siyasət komitəsinin sədri Hadi Rəcəbli bildirdi ki, sənədin iki maddəsinə dəyişiklik edilir. Dəyişikliklərin mahiyyəti mərc-idman oyunları zamanı rəsmi operatorun iştirakının təminatı ilə bağlıdır. Sənəd səsə qoyularaq qəbul edildi.
Sonra “Təbii inhisarlar haqqında” və “Sahibkarlıq fəaliyyəti haqqında” qanun layihələrinə edilən dəyişikliklərə baxıldı. Hər iki sənədə edilən dəyişikliklər deputatlar tərəfindən razılıqla qarşılandı və sənəd səsə qoyularaq qəbul edildi.
“Sosial sığorta haqqında” və “Əhalinin sağlamlığı haqqında” qanunlara edilən dəyişikliklərlə bağlı Sosial siyasət komitəsinin sədri Hadı Rəcəbli məlumat verdi. Bildirildi ki, dəyişikliyə əsasən, müvafiq icra strukturları tərəfindən qeysəriyyə kəsiyi əməliyyatının dövlət və qeyri-dövlət tibb müəssisələrində aparılmasına icazə verilmirsə, qeyri-qanuni şəkildə bu əməliyyatın aparılmasına imkan verən klinikalar və şəxslər məsuliyyətə cəlb olunacaqlar. Hadi Rəcəbli qeyd etdi ki, dəyişikliklər bu sahədə sui-istifadə hallarının qarşısının alınmasına xidmət edəcək. Layihə səsə qoyularaq qəbul edildi.
"Məhkəmə-Hüquq Şurası haqqında" qanuna dəyişikliklər barədə məlumat verən Hüquq siyasəti və dövlət quruculuğu komitəsinin sədri Əli Hüseynli bildirdi ki, hakimlərə onların öz razılığı ilə iki ilədək müddətə digər məhkəmə strukturlarında ezamiyyətə göndərmək hüququ veriləcək. Sənəd səsvermə yolu ilə təsdiqləndi.
Azərbaycanda qanunsuz dini təyinatlı məhsullara görə cinayət məsuliyyəti sərtləşdiriləcək. Bunu Cinayət Məcəlləsinin müvafiq maddəsinə edilən dəyişiklik barədə məlumat verən Hüquq siyasəti və dövlət quruculuğu komitəsinin sədri Əli Hüseynli bildirdi. Məcəllənin 167-2 maddəsinə edilən dəyişikliklərə görə, müvafiq razılıq olmadan dini təyinatlı ədəbiyyatı, audio və video materialları, dini məzmunlu başqa məlumatları istehsal etmə, idxal etmə, satma və yaymaya görə 5 min manatdan 7 min manata qədər cərimə və ya 2 ilə qədər müddətdə azadlıqdan mərhumetmə cəzası tətbiq olunacaq. Eyni əməllər qabaqcadan əlbir olan bir qrup şəxs və ya mütəşəkkil dəstə tərəfindən törədildikdə, vəzifəli şəxs öz qulluq mövqeyindən istifadə edərək bunu törətdikdə 7 min manatdan 9 min manatadək cərimə və ya 2 ildən 5 ilə qədər azadlıqdan məhrumetmə ilə cəzalandırılacaq. Layihə səs çoxluğu ilə qəbul edildi.
Sonra İnzibati Xətalar Məcəlləsinə dəyişikliklər müzakirəyə çıxarıldı. Layihəni şərh edən Əli Hüseynli bildirdi ki, məcəllənin bir neçə maddəsinə dəyişiklik edilir. Qiymətli kağızlar bazarında investorların hüquqlarının pozulmasına və ya qanunsuz olaraq hər hansı şəkildə məhdudlaşdırılmasına görə vəzifəli şəxslər 400 manatdan 600 manatadək, hüquqi şəxslər 4000 manatdan 6000 manatadək cərimə ediləcəklər. Digər bir maddəyə edilən dəyişikliyə əsasən qiymətli kağızlar emissiyası və buraxılışı qaydalarının pozulmasına görə fiziki şəxslər 200 manatdan 400 manatadək, vəzifəli şəxslər 600 manatdan 800 manatadək, hüquqi şəxslər 3000 manatdan 5000 manatadək cərimə ediləcəklər. 211-ci maddəyə edilən dəyişikliyə görə isə qiymətli kağızlarla əqdlərin bağlanması qaydalarının pozulmasına görə vəzifəli şəxslər 500 manatdan 600 manatadək, hüquqi şəxslər 3000 manatdan 4000 manatadək cərimə ediləcəklər. Layihə səsə qoyularaq təsdiq olundu.
Sonra iclasda “Seleksiya nailiyyətləri haqqında”, “Toxumçuluq haqqında”, “Üzümçülük və şərabçılıq haqqında”, “Yeyinti məhsulları haqqında”, “Kənd təsərrüfatında sığortanın stimullaşdırılması haqqında”, “Ekoloji təmiz kənd təsərrüfatı haqqında” qanun layihələrində redaktə xarakterli dəyişikliklər müzakirə edilərək qəbul edildi.
Gündəlikdə duran digər məsələ - “Yol hərəkəti haqqında” qanuna edilən dəyişikliklə əlaqədar məlumat verən Əli Hüseynli bildirdi ki, dəyişiklik əcnəbilərin hüquqları ilə bağlıdır və miqrasiya sahəsində həyata keçirilən proseslərin gücləndirilməsini özündə ehtiva edir. Əcnəbilər yol hərəkəti qaydaları ilə bağlı saxlanılarkən şəxsiyyəti təsdiq edən sənəd təqdim etməlidirlər. Bu sənədin qəbulu ilə əlaqədar “Dövlət rüsumu haqqında” qanunda da müvafiq dəyişiklik qəbul edildi.
İclasda Azərbaycan Respublikasının 2007-ci il 10 aprel tarixli 267-IIIQ nömrəli Qanunu ilə təsdiq edilmiş "Azərbaycan Respublikasına qayıdış şəhadətnaməsinin verilməsi qaydası haqqında Əsasnamə"də və Azərbaycan Respublikasının 1999-cu il 8 dekabr tarixli 773-IQ nömrəli Qanunu ilə təsdiq edilmiş "Yaşayış yeri və olduğu yer üzrə qeydiyyat haqqında" Azərbaycan Respublikası Qanununun tətbiqi haqqında Əsasnamə"də dəyişikliklər edilməsi barədə sənədlər də müzakirə olunaraq qəbul edildi.
İclasda “Avtomobil nəqliyyatı haqqında” qanun layihəsinə edilən dəyişikliyə də baxıldı və səsə qoyularaq təsdiq edildi.
İclasda “Azərbaycan Respublikası Dövlət bayrağının istifadəsi qaydaları haqqında” qanuna edilən dəyişikliyə də baxıldı. Bildirildi ki, qanunun 9.2-ci maddəsi aşağıdakı redaksiyada təklif edilir: “9.2. Azərbaycan Respublikası Dövlət bayrağının sənaye üsulu ilə hazırlanması, düzəldilməsi, rəngli təsvirinin çapı zamanı onun mavi rənginin “Panton” rənglər kataloqunun Pantone 306C rənginə, qırmızı rənginin Pantone Red 032C rənginə, yaşıl rənginin Pantone 362C rənginə uyğunluğu təmin edilməlidir”. Müzakirələrdən sonra sənəd səsə qoyularaq qəbul olundu.
Bununla da Milli Məclisin bugünkü iclası öz işini başa çatdırdı.
Milli Məclisin
Mətbuat xidməti