AŞPA-nın Büro və Daimi Komitəsinin iclasları keçiriləcək
Noyabrın 22-də Vyanada Avropa Şurası Parlament Assambleyasının Büro və Daimi Komitəsinin iclasları keçiriləcək. İclaslarda Milli Məclisin Beynəlxalq münasibətlər və parlamentlərarası əlaqələr Komitəsinin sədri, ölkəmizin təşkilatdakı daimi nümayəndə heyətinin rəhbəri Səməd Seyidov və nümayəndə heyətinin üzvü Rafael Hüseynov iştirak edəcəklər.
İclaslarda Avropada miqrasiya, qaçqınlar və məcburi köçkünlərlə bağlı problemlər, Azərbaycanda və Gürcüstanda son prezident seçkilərinin nəticələri, gender bərabərliyi, diskriminasiya və qadınlara qarşı zorakılığın digər növləri ilə mübarizə, Əfqanıstandan uyuşdurucu maddələrin nəqlinin Avropadakı təhlükəsizliyə təsiri, insan orqanları ilə alverə qarşı mübarizə, nəhəng meqapolislərdə idarəçiliyin təşkili, AŞPA üzvlərinin davranışına nəzarət və digər mövzular müzakirə olunacaqdır.
Daimi Komitənin iclasında deputat Rafael Hüseynov "Qeyri-üzv dövlətlərin Avropa Şurasının konvensiyalarında iştirakı" mövzusunda məruzə ilə çıxış edəcək, məruzə ətrafında müzakirələr aparılacaqdır.
Milli Məclisin
Mətbuat xidməti